ORANJESTAD, Aruba: Diasabra mainta e parkeerplaats di Aruba Bank Camacuri a conta cu un multitud di muchanan y mayornan prepara pa participa den e Olympic Day Run 2019. Instituto Biba Saludabel y Activo (IBiSA), COA conhuntamente cu Aruba Bank a organisa e evento cu diferente actividad deportivo en conexion cu olimpiada escolar.
Mas di 450 mucha a core y cana distancianan di 1-2-3 kilometer y a participa den diferente “heat” pa asina por a saca e miho tempo overall di e prome 3 luga den e categorianan di edad pa tanto mucha muhe como mucha homber. Desde oranan trempan muchanan y hende grandi a yega pa registra e muchanan pa cana y core pasando un rato agradabel.
Riba programa despues di e competencia a sigui “Meet the Top Athletes”, unda tabatin demostracion di diferente deporte. Tambe cu un sonrisa na nan cara, e muchanan a disfruta di e kids corner. E mainta tabata uno yen di actividad cu e muchanan a participa na dje.
Aruba Bank ta gradici cada mucha y mayor cu a trece nan yiu(nan) na e Olympic Day Run 2019. Tambe na IBiSA y boluntarionan cu a yuda haci e dia aki uno inolvidabel pa tur mucha por a disfruta di esaki.
