ORANJESTAD, Aruba – 7 di Juni 2019: Dr. Horacio E. Oduber Hospital a organisa un bes mas dos dia di chekeo di salud pa su mesun empleadonan. Esaki ta di 5 biaha cu ta organisa e tan conoci “health check” pa asina duna empuhe na tur cu ta traha na HOH pa biba un bida (mas) saludabel. Tabatin 5 stacion disponibel na unda por a check peso/haltura, presion, colesterol, sucu, chekeo di wowo y test di condicion.
Na aña 2003 a organisa e prome “health check”, y despues di esaki te dia di awe a sigui cu e bunita iniciativa aki. Awo Hospital ta purba di organisa esaki cada dos aña y mester menciona cu cada biaha e acogida a sigui crece, asina Denise Koolman, Medisch maatschappelijk werker di Revalidatie afdeling, a duna di conoce.
Rachel Kraaijvanger, Manager Revalidatie & Paramedisch Ondersteuning, a gradici Hunta di Directiva di hospital p’e sosten cu nan a ricibi pa haci e evento aki un biaha mas posibel y exitoso. Un comision di departamento di Revalidatie consistiendo di coleganan Denise Koolman, Samantha Silva y Geraldine Jean-Baptiste tabata encarga cu e organisacion completo y pues un palabra di gratitud ta bay na nan. E comision a traha duro y a logra pa haci e evento aki uno fructifero un biaha mas.
Un palabra di gradicimento ta bay na Optica Leslie y Aruba Vision Center pa nan colaboracion pa loke ta chekeo di wowo durante e dos dianan di e “health check”. Tambe un danki di curason ta bay pa Aruba Heart Foundation cu ta yuda den loke ta haci e diferente testnan. Mi ta kere cu nos ta birando mas consciente cu nos ta den areanan di cuido tambe, mester cuida nos mes prome pasobra asina no por cuida.
