Parlamentario mr. drs. Arthur Dowers a bisa durante conferencia di prensa di Partido AVP cu a constata un bes mas cu pueblotin cu sigui sufri pasobra politico ta celebrando e hecho, cu dor di engaño, a drenta gobierno y sabiendo cu esaki ta nan prome y ultimo chens cu nan lo haya pa ta den gobierno, nan ta fiestando y mas cu tur cos ta biahando mas cu piloto den e dianan aki. Ta increibel pero asina ta, te asta piloto ta mara na cierto cantidad di ora cu nan tin cu sosega prome cu biaha pero Ministernan no mester di sosiego pasobra ta den e avion nan ta drumi, lanta na tera un rato, yega e pais aki, cambia maleta y sigui.
Ta increibel di mira awe un gobierno, caminda un Evelyn Wever Croes cu a vocifera di para biahamento y baha gasto di gobierno cu 70 miyon florin, awe ta di fiesta. Tin cu bisa cu esey pueblo a kere. Pueblo a kere cu e lo sinta den oficina traha pa nan, asina baha gasto di Gobierno cu 70 miyon y logicamente e ora ey no tabatin mester di suta pueblo cu medida! Locual e pueblo ta biba awe ta lo contrario. Un señora di edad grandi cu ta biaha bay te Roma riba costo di e pais aki, acompaña pa henter un “entourage” pa bay haci un filmacion, creando un show comosifuera a haya invitacion dor di Papa di Roma. Si e por bay asina leu di gaña riba Papa di Roma anto e ora ey ta kico mas por spera di dje, asina Parlamentario Dowers ta puntra.
Momento historicamente bergonsoso cu e pais aki ta pasa aden mientras e ta bezig batiendo e pueblo aki cu medida. Tristo pa constata cu e mes un Minister President, despues di a baha di su “Tour” na Europa, a dicidi cu awo e ta bay Virgin Islands. Lubidando acusacionnan fuerte den pasado cu bishita y maletanan pa Virgin Islands, caminda tin cu cuestiona kico lo ta e beneficio cu e bishita aki lo trece pa Aruba. Ta asina ta para biahamento y baha gasto?
Premier Wever Croes a biaha pa Cuba y regresando di su biahe pa Cuba a toca turno na su colega, Minister Priki, cu tambe a yega Cuba y for di eynan ta manda mensahe cu e lo ta cumprando regalo, cu placa di dagvergoeding, pasobra e stima Cuba y e Gobiernacion di Cuba.
Cu tur esaki Parlamentario Arthur Dowers ta puntra: Kico ta pasando riba e Pais aki. Esaki ta e modelo cu nan a bay wak pa introduci riba Aruba, caminda lo caba cu e pueblo, caba cu comercio, caba cu tur loke ta haci cu e pais aki un pais liber, cu un economia cu ta crese y florece pa hinca nos pueblo den e mesun direccion cu Cuba?
Ta esey so por conclui na momento cu mira dos Minister di un pais democratico bishitando Cuba comosifuera cu na Cuba tin universidad di politica. Mester tene na cuenta cu e mesun hendenan aki ta bon amigo di Presidente Maduro na Venezuela, cu intencion di a habri frontera pa nan, pero no a logra pero asina mes ilegalnan ta keda drenta, ricibiendo saludo for di e gobierno aki pa pidi asilo politico pasobra Evelyn Wever Croes a invita nan. Cu intencion di a mandanan Boneiro pero te cu dia di awe niun a bandona nos isla mas, tur a keda riba e pais akinan, cu tur e consecuencianan!