Fin di siman cu a pasa, B2L, Born To Lead, tawata tin un evento expectacular cual su meta tabata pa empodera y inspira cientos di muhernan pa busca y cana den nan proposito. Un sala yen na Ballroom di Aruba Marriott Resort cu a wordo dorna cu e presencia di hopi hende muher, y tambe cabayero nan, cu conhuntamente a wordo impacta pa e tres oradoranan di e dos anochinan poderoso aki. B2L, Born To Lead, Naci pa Lidera, su meta principal ta pa empodera hende muhe pa ta exitoso den nan proposito y sirbi nan hogar, communidad y Dios miho den e yamada cu cada un a ricibi.
E Prome anochi, Prome Minister di Aruba tawata parti di e panel di discusion na unda cu e miembronan di B2L tawata tin diferente pregunta pa Prome Minister Evelyn Wever-Croes. Prome Minister a conta di e proceso den su bida cu awe a pone cu e ta e prome Minister President feminino di nos dushi pais Aruba. Min Pres a enfatisa riba 4 punto cu ta pone e balansa den su bida pa logra su proposito mencionando cu un punto hopi importante ta spiritualidad. E conexion cu e tin cu Dios den su bida diario y su fe den Dios ta e forsa pa tuma desicionnan importante tanto den su bida personal como tambe pa tuma miho decision pa e pais cu e ta lidera.
E di dos anochi, Directora di Departamento di Impuesto, Sra. Luenne Gomez-Pieters, a sacudi e sala cu su palabranan di encurashamento, durante e seccion di panel descusion cu miembronan di B2L. Señora Luenne Gomez-Pieters a conta su trayectoria di educashon, esfuerso, exito y con e la siña pa cana den su proposito como yiu, mama, profesional y den su bida spiritual como yiu di Dios. Señora Gomez-Pieters a encurasha tur presente pa keda conecta cu nos Creador kende ta e fuente di nos existencia. Dios a crea nos cu talentonan y cu un proposito. Sra. Luenne a ilustra nos tempo como e strepi mey mey di nos fecha di nacemento y e fecha di nos fayecimento. E strepi mey mey ey ta e cos di mas importante. E ta representa e tempo cu cada un di nos a haya pa biba aki riba mundu. E pregunta na cada un di nos ta, kico nos ta haci cu e tempo aki cu Dios a duna nos. Sra. Luenne a encurasha tur presente pa uza nan tempo pa impacta bida di otronan pa duna honor y gloria na Dios. Cana conecta cu Dios, y lo bo cana den e proposito pa cual bo a wordo yama pa cana aden.
E punto culminante di e dos anochinan di e conferencia tawata e presentacion di Licenciada Pastora Yesenia Then, di Republica di Santo Domingo, kende tawata e invitado Internacional na e Conferencia “Muhernan di Proposito.” Lic. Pastora Yesenia, su mensahe principal pa tur dos anochi tawata pa encurasha, edifica, inspira y activa cada hende muher atraves di e palabra bibo di Dios. Tambe e la pone enfasis con cada hende muhe di Dios ta mas fuerte y por vence cualkier obstaculo ora nan ta kere cu nan ta ‘Muhernan di Proposito”.
Pastora Roselyn Berlis, den nomber di Comision di B2L, ta gradici Prome Minister Evelyn Wever-Croes, Señora Luenne Gomez-Pieters, y Pastora Yesenia Then pa nan mensahe inspirativo y di empoderamiento durante e Conferencia “Muhernan di Proposito.” Dos anochi hopi bunita na unda cu un grupo grandi di hende muher a wordo empodera scuchando e experiencia, sabiduria y consehonan spiritual cu a sirbi pa motiva y activa cada un pa busca cu intensidad y intencionalidad e proposito di nan bida.
Danki na tur cu a haci e Conferencia “Muhernan di Proposito” un exito asina bunita y grandi. B2L ta extende e invitacion na pueblo di Aruba for di awo caba pa e conferencia pa empodera hende muher otro aña.