Diamars 04 di juni 2019 minister Otmar Oduber lo ta presente den sala di Parlamento pa asina contesta varios pregunta cu Parlamentario Alan Howell tin pe. Esaki muy en especial riba e topiconan di Incineratornan, Parkietenbos y Sanitary Landfill. Tambe tur e otro 20 parlamentarionan lo tin e oportunidad pa haci pregunta na e minister en cuestion.
Parlamentario Howell, ta considera cu ta importante pa Minister bay Parlamento pa responsabilisa su mes pa cu e desaroyo nobo cu ta tumando lugar y pa e por contesta preguntanan cu tin. Alan Howell ta di opinion cu ta deber di un parlamentario pa haci un minister pregunta na bienestar di nos pais.
Esaki ta e preguntanan cu entre otro Parlamentario Howell lo desea contesta riba nan:
- Minister lo por splica den ki fase e proceso di destaho ta pa locual ta e waste to energy facility pa Aruba?
- Minister por splica ki partidonan ta envolvi den esaki cu ta sostene Pais Aruba?
- Minister por splica den ki fase e destaho di remediacion di Parkietenbos ta y ki interes esaki a ricibi nacional y internacionalmente?
- Minister por splica kico lo pasa cu sushi cu no por bay e waste to energy facility?
- Minister por splica con lo financia e diferente destahonan (waste to energy/ parkietenbos)?
- Pa locual ta incinerator di medical waste/cadaver, minister por splica si un destaho publico a tuma luga pa cu esaki?
- Acaso esaki e tuma luga minister por splica con esaki a tuma luga?
- Minister por informa cuanto e incinerator pa medical waste y sludge a costa?
- Pa locual ta e incinerator, minister por splica con esaki lo wordo financia?
- Cua lo ta e efecto pa presupuesto di Pais Aruba awo y den futuro?
- Minister por splica kico e motibo ta pa adkiri dicho incinerator?
- Minister por splica e papel di Serlimar den esaki?
- Minister por splica riba e plan pa locual ta solucion pa dump ilegal?
Despues di e vragenuur Parlamentario di Fraccion di POR lo duna mas informacion riba e informacion presenta pa Minister Oduber.