ORANJESTAD,Aruba – Traimerdia ta existi mas di 20 aña y Traimerdia tey pa keda. Traimerdia ta dunando un servicio na nos comunidad cu tin mester, esey kiermen cu tur mayornan cu tin yiunan cu ta bay Traimerdia, no mester preocupa. Minister di Enseñansa Armando Rudy Lampe ta sigura cu Traimerdia ta bay continua cu su servicio.
“Sinembargo, tur loke cu ta wordo bisa of crea tras di mi lomba, no ta cuadra cu realidad, e ta puramente un wega politico cu ta wordo haci pa crea duda y un imprecion den comunidad pa motibonan politico. Ta lamenta cu na momento cu esaki sosode no ta wak e interes di e mucha ni e interes di Aruba, pero e interes di nan partido”, Minister Lampe a expresa.
Minister Lampe ta sigui bisa cu esaki ta un modo y strategia pa purba di traha riba emocion di mayornan. “Nos tur sa cu e mayornan tin un necesidad. Ken na Aruba no sa cu e desaroyo economico na Aruba a bay den e direccion cu e ta actualmente, unda cu tur dos pareha ta traha y tin biaha nan mester traha dos trabao”.
Segun e mandatario pa e motibonan aki mes tin e necesidad di un Traimerdia pa despues di oranan di scol duna guia na e muchanan. Esaki ta un necesidad social y como Gobierno nos ta asumi nos responsabilidad y ta continua cu e proyecto di traimerdia. Tur mayor por keda trankil, Traimerdia ta continua despues di augustus 2019 y pa e aña escolar cu ta termina pa juli 2020. Y pa semper e proyecto lo continua manera tur aña.
Minister Armando Rudy Lampe ta lamenta cu ta fomenta rumornan falso. Nunca a haci un estudio y tampoco no tin un raport pa elimina Traimerdia. Traimerdia a demostra cu e ta responde na un necesidad social y pa es motibo aki mes lo continua cu e proyecto aki.
Loke cu tambe ta di lamenta, segun Minister Lampe, cu e mes un grupo cu ta trece informacion incorecto, a crea duda tambe pa esnan cu ta traha den Traimerdia. Pa e motibo aki mes esnan cu ta traha den Traimerdia a bin protesta dilanti Bestuurskantoor debi cu nan tin mal informacion unda cu a crea FAKE NEWS.
Minister Armando Rudy Lampe a ofrece na tur esnan cu ta traha na Traimerdia pa haci un estudio debi cu den enseñansa regular Aruba tin mester di docentenan pa haci e trabao di asistente di docente y di klas. Awor Gobierno lo cuminsa cu diferente opleiding cu por ofrece na esnan cu ta traha na Traimerdia.
E docentenan di Traimerdia ya caba a demostra cu nan tin amor pa muchanan y si nan ta desea sigui studia y haya un miho salario, alabes haya un trabao ful time di 40 ora, nan por logra esaki. E docente di Traimerdia por sigui y desaroya su mes y cuminsa un carera den enseñansa mes. Esaki ta un progreso personal y un miho futuro pa cada uno cu ta traha na Traimerdia. Minister Lampe ta lamenta cu e oferta aki a keda malintepreta y a causa cu tin bruhacion. Gobierno di Aruba lo continua cu su responsabilidad