ORANJESTAD – Aruba Airport Authority N.V. (AAA) hunto cu su partnernan di e proyecto a finalisa e diseño y documento di tender pa e construccion di e “main terminal”, y a completa e
proceso di precualificacion pa e bidnan pa e contract pa e construccion di e main terminal. E trabounan di preparacion, realocacion y mehoracion di aeropuerto su sistema principal di utilidad ta andando y den e siguiente etapa lo conclui e resto di e proceso di planiamento pa asina e proyecto drenta e fase di construccion completo.
E resultadonan di e proceso di precualificacion pa e contract di construccion di e edificio principal ta finalisa y e siguiente 5 companianan lo participa den e proceso di tender: Aecon Group Inc., Ballast Nedam International Projects B.V., Bam International B.V., Bouygues Batiment International y Tav Tepe Akfe Construction & Operation Co. E contratista cu wordo selecta lo ta responsabel pa e construccion di e expansion di e terminal y tambe e cambionan y mehoracion di e caminda y parkinglot. E documento di Tender y tur pintura tecnico a wordo entrega dia 31 di Mei y e bishitanan na e sitio lo wordo plania den fin di Juni. Tur bid ta wordo spera di wordo ricibi den September.
“Nos ta ansioso cu e siguiente stap di e proyecto Gateway 2030. E participacion di e companianan di construccion internacional cu hopi experiencia lo brinda e conocimento y experticio necesario pa di forma efectivo realisa nos programa di construccion y tambe brinda oportunidad y partnership cu subcontratistanan local pa traha hunto cu nan pa brinda tambe oportunidad di empleo local. E expansion di e terminal cu 34.000 m2, den un tempo estima di 4 aña di construccion, lo brinda e upgrade di capacidad y servicio necesario pa e cantidad creciente di pasahero cu ta pasa door di nos aeropuerto tur dia. Nos ta hopi satisfecho cu e experiencia y experticio di e companianan di construccion cu a precualifica pa participa den e bid y nos ta confia cu e proceso lo culmina cu resultado positivo. Nos ta ansioso pa mira e construccion tuma lugar pa Aeropuerto di Aruba su Proyecto di infrastructura,” asina AAA su CEO Sr. James Fazio a bisa.