Parke Nacional Arikok: Diaranson for di 9’or di mainta un grupo grandi di polis y personal di DTP ta haciendo controlnan rigoroso riba e ATV y UTVnan di e companianan di Tour, esaki a sosode net prome cu e entrada di parke biniendo for di San Fuego. E control a wordo teni na e sitio aki pa motibo cu mayoria di tour ta pasa den Parke Arikok, a controla tur cu tabata bay drenta y tur cu a caba di sali for di Parke Arikok.
E agentenan a controla tur e vehiculonan aki riba nan papelnan, si tur ta na ordo y tambe riba nan funcionamento, si e vehiculonan aki nan lusnan, brake etc.ta funciona manera debe ser. Varios Utv y Atv’s no tabata cumpli cu e exigencianan of nan papelnan no tabata na ordo y nan a keda confisca pa autoridad, esakinan a wordo transporta takelwagen pa Warda di Polis.
Tur esnan cu tabata riba tour y nan vehiculonan tabata cumpli cu tur exigencia y nan papenanl tabata na ordo por a sigui cu nan tour sin problema.
Tambe companianan di tour tabata bin trece otro vehiculo,pa remplaca esun confisca, pa asina e turistanan por a sigui cu nan tour, te hasta un compania a yega na e sitio cu un van pa transporta e turistanan.
Autoridad haciendo controlnan severo pa asina trata na evita cu nos bishitantenan ta sinta den un vehiculo cu no ta adecua pa ta riba caminda of su papelnan no ta na ordo. Probablemente e meta di e controlnan aki lo ta pa e companianan percura pa pone tur nan vehiculonan na ordo y tambe pa percura cu nan ta cumpli cu e exigencianan, asina trata na evita cualkier incidente cu lo por tin consecuencia pa e companianan y te asta pa Aruba su nomber.
