Den un forma diferente Dr. Horacio E. Oduber Hospital a scoge su empleado di luna di april. Empleadonan di LabHOH a bini hunto, unda cu Director di Cuido, Ezzard Cilié, tabatin un aviso importante. A resulta cu entre nan tin un empleado di luna y sr. Cilié a revela cu esaki a resulta den persona di Jaime Zievinger. E tin ya caba 40 aña trahando den departamento di Patologia como analist y ta un empleado ehemplar den e departamento.
Sr. Cilié a gradici’e p’e confiansa cu e ta duna hospital y cu semper por depende riba dje. Ta masha satisfecho di e añanan y loke e ta nifica pa Hospital y ta spera di conta riba dje pa hopi aña mas.
E team di e departamento a nomina Jamie Zievinger a base di criterianan duna manera servicial, cooperacion, integridad, profesional y iniciativa. Jaime Zievinger tin tur cualidad menciona pa ta e empleado di luna, pero tambe empleado di aña di hospital asina su colega y teamleider di e departamento sra. Cyrielle Lacle-Diaz a conta. Semper e ta bay e extra miya pa clientenan, pasobra ora yam’e for di orario di trabou e ta cla pa yuda y ta coopera pa cumpli cu e trabou necesario. Hasta ora mester bin mas trempan door di ‘drukte’ e ta cumpli sin keha. Ademas, e por brinda asistencia ora di autopsia cu por dura mas largo cu normal.
Den su carera Jaime a traha cu diferente colega y asina ta demostra di por traha cu coleganan di diferente caracter. Riba tereno di integridad Jaime ta traha na un manera preciso y nechi. E ta un persona responsabel y ta haci tur posibel pa mehora su trabou si e mes no ta satisfecho cu ne. E privacidad di pashent semper ta na prome luga y e ta traha cu hopi respet pa e pashent. Jaime tambe ta hopi profesional y ta domina su funcion y trabou hopi bon. Aunke e tin 40 aña caba den servicio e ta keda mantene su conocemento y ta prudente den busca informacion den literatura.
Jaime no a spera cu e lo bira empleado di luna y tabata un sorpresa grandi pe. E ta haya cu ta algo hopi great di su coleganan pa a nomin’e como empleado di luna. Pa por ta haciendo e trabou aki pa 40 aña, el a duna di conoce cu mester tin amor p’e trabou y e sigur ta stima su trabou.
Jaime ta asisti na e autopsia medico y forensico. Diariamente su trabou ta encera na analisa e parti humano cu ta bin di e camber di operacion, dokter di cuero, veterinario etc. Ta manda e sample pe unda cu e ta corta nan, hinca nan den un cassette, despues e ta bay den un mashin pa saca e awa for di e ‘weefsel’ te ora e bira un tipo di wax. Ta cort’e y traha un ‘slide’ cu ta wordo entrega pa e patalogo cu ta diagnostica kico e pashent tin pa specialistanan por brinda e pashent e tratamento corecto.
Pabien Jaime cu e bunita reconocimento bon mereci!