Cu aprobacion di Minister di Turismo, Salubridad Publico y Deporte lo bay inicia e transformacion di e area caminda nos waf ta situa. E obhetivo ta pa converti e area aki yama Port City den un area atractivo y vibrante pa Oranjestad y e comunidad henter di Aruba como tambe pa nos turistanan, door di combina usonan di recreacion, residencianan y negoshinan. Port City lo bay conecta hende, e zona urbano y e ciudad di Oranjestad y tambe nos lama caribense. E plan ta consisti di un area di aproximadamente 20 hectar y lo inclui un parke hopi grandi accesibel pa publico. Inversion total di e proyecto aki ta calcula na 550 Miyon Dollar cu un duracion di 10 aña, di locual 500 miyon lo ta inversion di inversionista y contratistanan priva.
Na e momentonan aki e Proyecto ta den su fase final pa cuminsa e proceso di destaho. Pais Aruba lo bai beneficia grandemente di e Proyecto aki mirando cu e lo a bai crea entrada pa gobierno, lo bai genera empleo, lo bai stimula economia y asin a cobntribui na e GDP. Mas importante den henter esaki ta cu lo bin areanan di recreo pa communidad por haci uso di nan.
Dentro di poco lo cuminsa ehecucion di e Proyecto cu ta asina importante pa pais Aruba. Henter gobierno a aproba e Proyecto aki desde luna di januari y departamentonan concerni hunto cu APA a bin ta trahando riba esaki pa por finalisa tur detayes pa asina e destaho por tuma lugar.