“Nos Gobierno su vision ta pa cambia e falta di confiansa den nos institucionnan, nos tawata kier a gana e confiansa di nos hendenan bek. Pa e motibo aki, nos ta pone integridad como prioridad riba nos agende politico. Pero pa priorisa Bon Gobernacion y Integridad den Gobierno, no ta bin sin su reto y limitacionnan”, ta loke Prome Minister Evelyn Wever-Croes a accentua den su reunion cu ‘Chief Information Officer’ di Gobierno di Estonia, señor Siim Sikkut.
Diaranson mainta Prome Minister a reuni cu señor Sikkut kende a expresa cu nan a haya informacion positivo di Aruba y cu nan ta mira cu nos ta serio den innovacion y Gobierno di Estonia ta dispuesto pa yuda nos realisa e metanan di e-Government.
E Burocracia cu tin den nos servicionan publico, ta obstaculisa nos facilidad pa haci negoshi como tambe e servicio cu nos ta brinda nos ciudadanonan. Gabinete Wever-Croes tin un compromiso pa implementa e-Government. Esaki lo no ta posibel si nos haci’e riba nos mes. Aruba ta confia riba e experiencia y conocimento di otro paisnan manera Estonia cu tawata exitoso cu e administracion electronico den e sistema gubernamental.
Den tur esfuerso di Gobierno di Aruba pa aumenta transparencia y integridad, Aruba lo establece un ekipo di e-Government cu e proposito pa implementa e ‘eGovernment Road Map’. Den esaki, nos lo sigui traha cu e Academia di e-Governance (eGA) di Estonia. Basa riba conseho di eGA, pa e siguiente 3 aña, nos lo concentra riba nos marco legal, I.D. digital y desaroya nos version di e ‘X-road’, cu ta e plataforma cu ta permiti nos comparti data den un manera sigur y eficiente.
Pa loke ta trata siguridad cibernetico, Aruba a establece un comision cu e tarea pa produci un ‘road map’, supervisa leynan y legislacion, desaroya principionan di un siguridad cibernetico. Den e area aki, ainda Aruba mester mas sosten y conocimento. Tin un ‘gap’ grandi tanto den e parti financiero como tambe den e parti di personal. Pa e motibo aki, tur ayudo cu nos por ricibi, sea asistenia tecnico, programanan di intercambio, of ayudo financiero tambe, tur ta bon bini.
“Aruba ta hopi satisfecho cu e sosten cu e ta hayando di eGA y lo desea di sigui traha hunto cu Estonia den e implementacion di e vision di Gobierno di Aruba. Considerando tambe cu Aruba ta un isla chikito, e cooperacion aki entre Aruba y Estonia por bira un storia exitoso di exportacion di conocemento pa Estonia. Gobierno ta convenci cu e-Government lo brinda miho servicio na tur ciudadano como tambe contribui na desaroyo economico. Na final di dia, loke cu nos ta desea ta pa mehora calidad di bida di tur ciudadano a traves di e-Government”, Premier Wever-Croes a duna di conoce.