Durante conferencia di prensa di mita di siman di Fraccion di Partido MEP, Parlamentario Setty Christiaans-Yarzagaray a felicita su colega Parlamentario Endy Croes kende recien a gana su caso despues di a lucha 10 aña largo inhustamente. Parlamentario Croes a lucha tur e añanan aki cu curashi, determinacion y perseverancia pasobra e tawata sa cu e no a haci nada malo.
Parlamentario Christiaans-Yarzagaray ta convenci cu Dios tawata cu Parlamentario Croes den tur e tempo aki saliendo for di e punto di bista cu normalmente un hende lo no a bringa asina tanto tempo of lo a entrega na caminda of lo a perde forsa. Y no solamente forsa fisico y mental pero, manera hopi biaha ta e caso, pa via financiero cu tambe ta hunga un rol grandi.
“Endy ta un hende cu semper ta mustra su positivismo y awo nos sa di unda esaki ta bin, pasobra cu fraccion tambe semper e tin un of otro mensahe positivo pa comparti den momento fastioso. Semper el a keda positivo y ta kere den locual ta husto y esaki el a demostra tambe awo cu 5 hues na Hulanda ta di acuerdo cu e 3 huesnan di Corsou cu Endy Croes ta inocente den ful a caso contra Ernst & Young/Lotto. Pues cu e companianan aki a manipula y persigui su persona sin ta funda no solamente pero door di fabrica prueba contra dj’e”, Parlamentario Setty Christiaans-Yarzagaray a expresa.
E caso aki, segun e Parlamentario, ta un muestra cu ora un hende persevera na momento di wordo persigui politicamente y ta logra prueba su inocencia y ta keda revela con malo un compania y e partido politico di oposicion a opera door di persigui su persona cu deseo pa destrui’e manera te e caso di Endy Croes.
E Parlamentario a indica cu e tipo di persecucion asina a pasa cu mas hende, aunke porta no na e magnitud aki, uzando ehempel y experencia di coleganan den cuerpo di ambtenaar di otro departamentonan. Asina tawata tin diferente otro caso cu nunca a bin dilanti manera ta e caso di Endy Croes, unda varios ambtenaar pa añas a bringa pa demostra cu nan no ta culpable pa locual nan a wordo kita for di trabou of cualkier motibo inhusto cu nan wordo tilda riba dje pa un of otro aspecto.
“Mi ta kere cu e logro di Endy ta bay hunto cu tur esnan cu tambe a bringa gobierno anterior y a gana nan caso cu por ta no a bin den lus di dia manera esun di Endy. Esaki sigur ta un les pa den futuro e mal hecho aki no ripiti cu niun hende mas na Aruba cu hendenan inocente. E positivismo, perseverancia y derteminacion di Parlamentario Croes awe ta laga refleha e realidad na unda el a sali inocente di tur locual el a wordo acusa di dj’e a base di mentira y mal informacion y fabricacion di docuemnto”, Parlamentario Setty Christiaans-Yarzagaray a expresa.