ORANJESTAD – Manera ya ta conoci, a bin cambio den e ley di gronbelasting cu ta valido entrante januari
2019. E cambionan ta lo siguiente:
1. A introduci e obligacion di haci declaracion.
2. A elimina e suma di dispensacion (suma liber di impuesto) di Afl. 60.000.
3. A introduci un sistema di tarifa cu diferente categoria cu ta depende fuertemente riba e balor di
propiedad inmobil.
4. A introduci un tarifa proporcional valido pa no-residentenan y propiedadnan comercial.
Introduccion di obligacion di haci declaracion
Pa e contribuyentenan cu nunca a haya un cobransa di grondbelasting, tin un obligacion di haci declaracion
di grondbelasting. Nan mester declara nan propiedadnan inmobil pa asina Departamento di Impuesto por
procesa nan cobransa di acuerdo cu e balor di propiedad corecto. Pa haci e declaracion aki por yena e
formulario ‘Registratie onroerend goed’ cual ta disponibel riba e website di Departamento di Impuesto:
www.impuesto.aw. Ta hopi importante pa inclui tur documento cu por ta necesario pa determina e balor
manera: copia di situatietekening, bouwvergunning, mapa di cas, taxatierapport, actanan di notario.
Si no haci declaracion, Departamento di Impuesto por manda un cobransa despues basa riba un calculacion.
Alabes e contribuyente lo por haya cobransanan cu por bay te cu 5 aña atras incluyendo un boet.
Eliminacion di suma di dispensacion
E suma di dispensacion di Afl. 60.000 no ta valido mas entrante 2019. Por ripara esaki tambe den e
calculacion cu ta poni na pagina 2 di e cobransa.
Sistema di tarifa pa persona residencia na Aruba
E tarifa pa personanan residencia na Aruba valido entrante 2019 ta depende e balor di propiedad.
Balor di propiedad (Afl.) Tarifa
Cuminsando cu Pero menos cu:
0 120.001 0%
120.001 250.000 0,2%
250.000 500.000 0,3%
500.000 750.000 0,4%
750.000 of mas 0,6%
Pa calcula e suma di grondbelasting, ta conta e balor di tur e propiedadnan hunto. E personanan cu nan
propiedad tin un balor di 120.000 of menos, lo no ricibi un cobransa (aanslag).
Tarifa proporcional pa personanan no residencia na Aruba y pa propiedadnan comercial
E tarifa pa personanan cu no ta residencia na Aruba y pa propiedadnan comercial ta 0,6% di e balor total di
propiedad (tarifa fiho).
Aña 2019 ta forma parti di e periodo di 5 aña esta 2017-2021. Esaki ta nifica cu no tawatin rebaloracion
masal di e propiedadnan.
Si un contribuyente ta desea di haya un splicacion encuanto su cobransa di 2019, e por yama of acudi na
Departamento di Impuesto na Camacuri libremente.