Bubali – Diaranson anochi den careda di 10’or polis a wordo avisa di un accidente cu herido altura di SuperFood.
Na yegada di polis ya seguro tawata na e sitio. E accidente e sosode altura di e crusada pariba di SuperFood.
Tawata trata di un accidente entre un brommer di 3 wiel y un Porsche.
Nos a papia cu e chauffeur di e Porsche y ela conta nos cu e tawata bayendo e rotonde, y diripiente ta wordo sorprendi pa un golpi fuerte den su banda.
E brommer a subi di pazuid sin duna preferencia y dal e Porsche.
Polis di trafico cu e yega a papia cu e motociclista, y e tawata sinti basta dolor di schouder y area di su pecho.
Ambulance a wordo pidi y na yegada Paramediconan a laga e motociclista subi den ambulance. Despues nan a bay na e chauffeur di e Porsche, pero e si tawata ok unicamente poco spanta di e airbag cu a bula y e glas cu a kibra spart ariba dje.
Pa loke ta e motociclista Paramediconan a opta pa transporte pa Hospital.