Home Politics Parlamentario Edgard Vrolijk (MEP): “Diabierna awor 24 mei 2019 un biaha...

Parlamentario Edgard Vrolijk (MEP): “Diabierna awor 24 mei 2019 un biaha mas pueblo lo disfruta di apertura di Olimpiada Escolar”

SHARE

 

 

Diabierna 24 mei 2019 un biaha mas pueblo lo disfruta di apertura di Olimpiada Escolar unda cu durante Gabinete Nelson Oduber e olimpiada tabata carga e nomber original cu ta Olimpiada Escolar Betico Croes y cu den su siguiente edicion ami como representante di pueblo lo kier wak un biaha mas. Mi ta contento si cu nos Minister di Deporte Dangui Oduber a percura pa esaki den un corto tempo ser realisa . E deseo di mi persona cu mi a vocifera den campaña pero tambe ta den nos programa di MEP a ser concretisa door di nos Minister di Deporte. Ta yena mi cu alegria cu tiki tiki nos ta cumpli cu locual nos a priminti. Nos no t’ey ainda unda nos kier ta pero nos ta sigui traha pa yega ey.

 

Bao Gabinete Eman 1 y 2 a cuminsa na kita e nomber di Betico Croes y lentamente a percura p’esaki ser kita completamente. Y esaki sigur ta di lamenta pasobra esaki tabata un evento grandi cu ta trece hobennan pa competi sanamente y ta crea e posibilidad di scolnan por luci tambe riba nan programa deportivo escolar. Nos tin di siña ora algo ta bon cu mester manten’e y percura pa mehoracion y no kita un nomber pa capricho politico pasobra e nomber aki tabata molestia nan. Mi persona cu semper a sa di participa na esaki dedicando hopi tempo na prepara nos atletanan pa duna nan maximo y pa mercadea un programa deportivo escolar di Cacique Macuarima, tabata hopi demotivante ora cu a termina cu e olimpiada debi cu esaki tabata e momento cu nos muchanan por a demostra nan talento deportivo pa tur hende wak y demostra esaki ganando varios titulo pa locual ta trata e deporte di volleyball y tambe tabata momentonan unda mayornan por tabata cu nan yiunan of por a sigui esaki pa medio di Telearuba. Olimpiada escolar pa hopi mucha ta un momento cu nan no lo lubida nunca mas.

 

E edicion aki di Olimpiada Escolar ta e comienso y sigur di awo caba mester cuminsa prepara pa e siguiente unda mester percura pa esaki ta mas grandi y percura pa conhuntamente cu e programa pa deporte despues di scol mester conoce mas participacion di scolnan y p’asina eleva e nivel di competencia.

 

Pa termina mi tin di gradici Minister Dangui Oduber pa su esfuerso pa por haci Olimpiada Escolar (Betico Croes) un realidad un biaha mas. Y sigur di mi parti mi ta desea tur scol participante y atletanan tur clase di exito.