ORANJESTAD – Diabierna ultimo Minister di Finansa,Asuntonan Economico y Cultura hunto cu Minister Presidente tabata na Banco Central pa desvelo di e serie nobo di placa di papel di florin pa Aruba. Un proyecto cu a dura 7 aña pa prepara y awe Aruba ta conoce e serie nobo cu e tema ‘Bida na Aruba’ den cual ta figura nos flora, fauna, herencia cultural monumentonan y lugarnan prominente na Aruba. Un bunita producto di nos artista local.
Cu e meta pa por tin placa di papel den circulacion di bon calidad y cu ta cumpli cu exigencianan halto di seguridad, Banco Central di Aruba ta introduci un serie di biyetenan di florin nobo cu un diseño completamente nobo y elementonan di siguridad di mas moderno.
Minister Ruiz-Maduro ta splica cu den e proceso pa yega na e serie nobo di biyetenan hopi hende a traha hopi duro pa asina awe Aruba por conta cu un serie nobo di biyete cu toke artistico local colorido y cu ta contene aspectonan di nos flora, fauna, tradicion, monumento y lugarnan importante di Aruba. Pa e proyecto aki a invita artistanan di Aruba pa competi pa e diseño. E serie aki ta conta cu caracteristicanan di seguridad hopi moderno y hasta unico. Cu confiansa por bisa cu Aruba su placa lo bolbe gana premio rond mundo pa su bunitesa. E mandatario a expresa palabra danki na tur artista, tur compania envolvi y na tur ehecutivo di Banco Central cu a haci e serie aki posibel.
Ban aprecia e obra di arte riba cada biyete cu ta refleha Aruba su flora, fauna, herencia cultural, monumentonan y lugarnan prominente na Aruba. Riba e prome biyete di e famia nobo ta nos 10 florin, nos por mira e Turtuga blanco, Fototo, Waira di lama, Cas floria y mosaico. Riba nos 25 florin, e segundo biyete nos tin nos Shoshoro, Trupial, Shoco, Cas Floria y Mosaico, pinturanan di cueba Arawak, Purun di ceramica. Riba e biyetenan di 50 florin e tercer biyete nos por aprecia e Cododo, Cangrew di tera, Willem II toren, Cas Floria y Mosaic, Banana di rif. Riba e di cuatro biyete esta e 100 florin, tin nos Yuwana, Aloe, Toteki, Cas floria, Mosaico y Baile di Cinta. E 200 florin ta e di cinco biyete di e famia nobo cu nos por admira e Dornasol, Warawara, Tuna, Caha di Orgel y Cas Floria y Mosaico.
Fechanan importante pa tene cuenta cune dia 3 di juni 2019 lo ta e emision di serie nobo di biyetenan di florin 2019. Di 3 di juni pa 11 di augustus 2019, lo tin co-circulacion di e serie nobo di biyetenan di florin 2019 hunto cu e serie di biyetenan di florin 2003. Desde 12 di augustus 2019, e serie di biyetenan di florin 2003 lo sali di circulacion. Pa e periodo 4 di juni pa 4 di december 2019, e cambio di serie di biyetenan di florin 2003 pa e serie nobo di biyetenan di florin 2019 lo por haci solamente na banconan comercial. Pa e periodo di 5 di december pa 12 di augustus 2049, e cambio di e serie di biyetenan di florin 2003 pa e serie nobo di biyetenan di florin 2019 por wordo haci solamente na Banco Central di Aruba.