Home Local School-To-Work-Transition DAO ta yama DANKI na tur e hobennan cu...

School-To-Work-Transition DAO ta yama DANKI na tur e hobennan cu a participa na e Encuesta pa Hobennan – Transicion di scol pa mercado laboral

SHARE


 

 

ORANJESTAD – Departamento di Labor y Investigacion (DAO) ta hopi orguyoso y agradecido cu por a conta cu e apoyo di nos comunidad durante su prome Encuesta dirigi riba e transicion di Estudio-pa-Empleo, cu a hiba e nomber di School to Work Transition Survey of SWTS 2019. A logra entrevista rond di 1800 hobennan entre 15 pa 29 aña.

 

Den e periodo di februari te cu mei 2019 Departamento di Labor y Investigacion (DAO) a tene su prome encuesta dirigi riba e transicion di Estudio-pa-Empleo, cu a hiba e nomber di School to Work Transition Survey of SWTS 2019. E SWTS 2019 tin como meta, genera informacion relevante y actual tocante e situacion y participacion di nos hobennan entre edad di 15 pa 29 aña den e mercado laboral, y tambe ilustra e dificultadnan cu por presenta ora e hobennan aki ta subi nos mercado laboral despues di a caba nan estudio.

 

Pa e SWTS 2019, a saca un muestra di adresnan reparti riba henter Aruba. Den e periodo di februari te mei a bisita un total 1500 adres na unda tin hobennan entre e edad di 15 pa 29 aña. Den e encuesta aki a entrevista solamente esnan di entre 15 pa 29 aña di edad. a ser entrevista y pa No tawata importa si e persona ta traha of no. Pa medio di e cuestionario a haci preguntanan tocante nan estudio y trayectoria riba e mercado laboral te cu awor.

Nos ta trata tur informacion colecta na un manera confidencial y lo haci e publicion solamente den forma agrega. Departamento di Labor y Investigacion  (DAO) ta garantisa anonimidad total riba e datonan.

 

E analysis di e data lo mester por demostra e puntonan fuerte y debil di nos mercado laboral, pa cu nos hobennan, y mustra e rasonnan di esakinan durante e transicion. Nos ta bay traduci e resultadonan di e encuesta den oportunidadnan pa empleo, programanan pa desaroyo y maneho pa nos hobennan.

Awor ta sigui pa e fase di analisa e informacion y e prome resultadonan lo publicanan den e di dos mitar di aña.

Pa mas informacion riba SWTS 2019, por tuma contacto cu e Oficina di Investigacion di Mercado Laboral (Bureau Arbeidsmarktonderzoek) na number di telefon 523-7720 entre 8:00am pa 4:30pm of e-mail nos na swtssurvey@gmail.com.