Mi persona ta hopi contento cu e veredicto di cassatie na Hulanda unda cu 5 hues a duna un veredicto na fabor di sr. Endy Croes unda cu a conclui cu Ernst & Young ta culpabel pa traha un rapport ilicito y falso cu ta yena cu mentira p’asina por a crea un mal imagen contra Endy Croes. Siguramente un rapport cu a ser hopi malusa politicamente contra Endy Croes y tambe contra e gobierno di MEP pa crea sensacionnan falso cu nan por a usa den nan bentaha pa por a yega y keda na poder, pero sigur pa por a haci maluso di Lotto pa Deporte pa beneficio personal. Manera nos grandinan ta bisa, Dios ta bisti pidjama pero e no ta drumi.
Persecucion politico
Mientras tanto 10 aña a transcuri cu a cuminsa cu e persecucion politico contra Endy Croes. Y pueblo por wak con leu esaki por bay unda cu un compania renombra manera Ernst &Young a presta su mes pa traha un rapport ilicito y alabes falso contra sr. Croes p’asina crea expectativa den comunidad cu gobierno anterior a haci maluso di fondonan di Lotto. E tristesa di tur esaki ta cu pa 10 aña desde cambio di gobernacion a hinca hopi placa den traha rapport y persigui sr. Croes, enbes di dedica na hinca e placa aki den deporte na Aruba. Pa 10 aña largo e deportistanan por a wak con Lotto pa Deporte a neglisha nos deporte unda cu awendia nos tin dos stadion nacional di deporte desaproba caminda no por hunga weganan internacional, nos canchanan rond Aruba den estado pesimo y sin conta nos facilidanan manera Parke Curason cu ta na e momento aki hopi mal manteni. Tambe tin scarcedad di material deportivo pa clubnan, luznan den mal estado y tambe falta di material deportivo escolar.
Inversionnan di Gabinete Oduber
Pues den 10 aña bao di Gabinete Mike Eman 1 y 2 nunca por a crea un facilidad manera tabata e caso bao di Gabinete Nelson Oduber IV unda a percura pa drecha Stadion Guillermo Prospero Trinidad y converti esaki den un hoya di stadion, Stadion di Frans Figaroa na Noord, Stadion di baseball den Santa Cruz, Stadionnan di Little League na Pos Chikito, Stadion di Jara y di un dump na Jaburibari a crea un Parke recreativo y asina por sigui menciona tur e facilidadnan cu a ser manteni y luznan cu tabata ser cambia constantemente. Pero desde final di 2009 a converti Lotto den un fundacion di saca probecho personal unda cu e mesun dirigentenan ta haci negoshi den esaki entre otro nos por a sigui e denuncia publico di nos Minister di Deporte Dangui Oduber den caso di e ex director y otro dirigentenan di Lotto.
Probecho personal
Keto bay nos Minister di Deporte Dangui Oduber ta en espera di un sentencia di Lotto unda cu prome cu cambio di gobierno e directiva actual a core cambia e statuto di Lotto pa percura cu nan por keda eyden sin cu manera tabata den pasado, cu ora tin cambio di gobierno e dirigentenan tambe ta bay. Pero ora tin hopi probecho personal sigur e grupo aki a percura pa nan keda y sigui explota Lotto pero e atletanan ta ser perhudica. P’esey mi ta kere cu e caso di Endy Croes y tambe cu tur e pruebanan entrega pa nos Minister actual Dangui Oduber no por keda hues nada mas cu duna un veredicto na bienestar di deportistanan. Asina por percura pa por haci un clean up di directiva y pone hendenan cu tin deporte na curason pa den corto tempo nos por percura pa mehora nos infrastructuranan deportivo pero tambe pa material pa nos deportistanan por practica nan deporte manera debe ser.
Algemene Rekenkamer
Parlamento recientemente a haya e grato noticia cu Algemene Rekenkamer por haci investigacionnan den Fundacion Lotto pa Deporte. Y den e dianan nos dilanti lo tende di parlamento cu lo sali un carta cu e solicitud oficial pa haci investigacion. Den esaki sigur pami tambe ta di importancia pa sa cuanto placa e rapport ilicito y falso a costa Aruba pero tambe cuanto placa a costa den su totalidad e caso aki, pasobra no por t’asina cu placa di e deportista por ser mal usa pa persigui hende y no a inverti den deporte y deportistanan.
Pa termina esaki ta un motibo mas pa pueblo mester percura pa AVP no yega mas na poder pa ta cerca di placa di pueblo pasobra nan strategia ta mas cu claro crea rabia contra otro combina cu un bon mercadeo y division p’asina nan por saca probecho personal y cu na final di dia awe nos ta biba e realidad caminda den tur aspecto a crea crisis, esta crisis financiero, economcio, social y sigur deportivo.