Algun siman atras minister Dangui Oduber a anuncia cu Aruba su plan nacional di prevencion ta den su fase final pa cuminsa cu ehecucion di esaki. Na e momentonan aki gastonan di cuido medico ta sigui aumenta y como minister responsabel pa salud di nos comunidad nos tin cu tuma accion. Nos comunidad no ta esun di mas saludabel y e consequencia cu esaki ta trece cune ta cu hopi hende ta sufri di malesanan cronico manera presion halto, suco, problemanan cu curason y tambe e indice di esnan cu ta dialyseer ta haltisimo. E indice mundial di persona nan cu mester dialyse ta 8% y na Aruba esaki ta 16%. Cada pashent cu mester e tratamento di dialyse ta costa 100.000 florin pa aña. No esaki so sino tur e otro gastonan cu ta subiendo.
Biba un bida saludabel no solamente ta yuda cada persona sino lo evita tambe cu gastonan medico lo bira impagabel. Nos a pone den nos programa di gobernacion cu nos lo bai pone enfasis riba prevencion y nos no ta haci esaki solamente cu palabra sino cu accionnan concreto. Nos a percura pa prome biaha den historia presupuesta placa pa prevencion. Esaki ta nifica cu nos lo ta hopi mas agresivo den campañanan di conscientisacion pa comunidad come saludabel, haci ehercicio y biba saludabel.
Segun World Health Organisation (WHO) cada ciudadano mester haci ehercicio por lo menos 30 miniuut tur dia. Nos comunidad mester evita di come productonan cu ta contene suco y salo. Esakinan ta hopi danino pa cu salud di nos comunidad. Ta nos deber pa nos educa nos comunidad riba e consequencianan di no come y biba saludabel. Ta pesey nos lo cuminsa cu diferente campaña di brinda informacion y tambe di conscientisacion pa cu prevencion di salud. United Nations a pone como meta cu pa aña 2030 nan lo kier reduci e NCD’s (non Communicable Deseases-malesanan cronico) cu 30% y logicamente Aruba tambe tin e deseo di logra e meta aki. E ta un meta en comun pa nos tin un comunidad mas saludabel.
Como gobierno nos ta trahando riba mas espacio tambe pa haci ehercicio, esaki nos a haci por ehempel na Malmok caminda na e momentonan aki e contruccion di esaki ta andando. Nos lo mehora e facilidadnan Deportivo pa haci nan atractivo pa stimula mas y mas hende participa activamente na deporte. Nos a introduci olimpiada escolar bek despues di 8 aña. Banda di esaki nos ta bai mehora e Cancha di basketball na Villaga y traha un riba facilidad Deportivo na Baby Beach.
Nos ta bai haci uzo tambe di MFA tambe pa cuminsa e proceso pa brinda comunidad e posibilidad di haci chekeo medico. Ta importante pa nos tin e datosnan aki pa asina nos por fiha nos maneho. Nos ta den proceso pa bin cu un centro medico na Noord caminda e intencion ta brinda mas servicio medico considerando e hecho cu Noord a crece masha hopi. Hunto cu AZV nos kier traha mas cu clinicanan priva pa asina tin competencia y na final mehora e servicio y cuido medico na Aruba.
Nos mensahe na comunidad di Aruba ta pa nos tur hunto ban come mas saludabel, ban participa mas activamente na deporte y haci ehercicio y na final di dia esaki lo conbtribui na un comunidad mas saludabel y un reduccion den gastonan medico.