KRALENDIJK – Diahuebs 16 di mei 2019 a tuma lugar e “Vierlanden Bestuurlijk Overleg” riba tereno di Salubridad Publico. E deliberacion aki ta un reunion cu anualmente ta ser teni entre e mandatarionan Minister Romer (Curacao), Minister Lee (St.Maarten), Staatssecretaris Blokhuis (Bonaire) y Minister Dangui Oduber (Aruba). Durante e reunion aki diferente palabracionnan ta wordo haci pa traha riba dje den e aña.
Algun logro di e colaboracion aki durante aña 2018 tabata cu bou guia di Aruba a logra resolve e problematica di “collegiale doorlevering” di medicina pa Curacao, Aruba y St. Maarten caminda e specialmente nos muchanan cu problema di salud lo haña nan remedinan necesario. Tambe a logra cu Aruba a sera un convenio cu Mental Health Caribbean pa asina yuda restructura nos cuido mental. Un otro resultado positivo ta cu pronto e Kind en Jeugd FACT Team lo bira un realidad, lo inicia cu programa pa nos muchanan pa duna nan mas educacion riba tereno di adiccion. Pa prome biaha e tres paisnan aki a logra tin un Crisis y Rampenplan pa asisti St. Maarten na momento di un calamidad, convenionan entre e hospitalnan y organisacionnan di Seguro a ser firma caminda lo bay stimula mas colaboracion entre e paisnan. Riba e tereno di prevencion Aruba y Curacao a inicia e proceso pa tin un plan nacional di prevencion contra “non-communicable diseases”. E cuatro paisnan a yega na palabracion cu lo bay traha mas estrecho pa asina comparti “best practices” cu otro.
Pa e aña nos dilanti a ser palabra cu e cuatro paisnan lo sigui traha riba e implementacion di International Health Regulations. Pa Aruba esaki ta significa entre otro cu lo sigui traha pa bin cu e “Landsverordening Publieke Gezondheidszorg”. Riba tereno di cuido curativo lo bay stimula mas “medische uitzendingen” entre e cuatro paisnan, tambe lo bay reconoce nos yuinan di tera cu a rekeri un of otro specialismo den region y asina duna nan e oportunidad pa traha den nan pais. Aruba lo sigui guia e trabounan encuanto registracion comun y compra conhunto di medicina den cuadro di e control di gastonan. A ser palabra tambe cu lo bay traha mas estrecho pa asina sigura un bon calidad di cuido e specialmente ofreci door di specialistanan den cada pais. Por ultimo a haci palabracion cu lo bay traha hunto riba “data sharing” y comparti “best practices” cu otro pa asina yega na un Health Information System cu ta pas pa cada pais.