Santa Rosa/DLVV tin algun aña caba plantando un tipo di hooi hopi popular na paisnan Latino Americano den nos region. Ta referi aki specificamente na e tipo di hooi yama ‘Pasto’ of ‘Pasto Morado’.
Saliendo for di e punto di bista cu Santa Rosa/DLVV ta conduci hopi investigacion na beneficio di Aruba su Sector Primario, a cuminsa planta hooi pa asina evalua si e ta factibel pa Aruba por produci esaki na un escala mas halto y cu por beneficia nos criadornan. Despues di hopi test a conclui cu e tipo di hooi cu tin mas factibilidad di crece na Aruba ta esun tipo ‘Pasto’. Aki ta unda cu e proyecto di plantacion di hooi a bira e fuente principal di alimentacion pa e bestianan cu tin na Santa Rosa.
Den e segmento di Panorama Agropecuario, cu ta pasa tur diaranson anochi durante Telenoticia na Telearuba, e siman aki Randy a mustra con e proceso di plantacion y recoleccion di hooi ta tuma lugar na Santa Rosa/DLVV. Por a mira un plantacion extenso di hooi tipo “Pasto” cu tin na Santa Rosa, cu mester wordo procesa di un manera specifico pa asina e ta apto pa cria e bestianan cu ta alimenta di dje.
Santa Rosa ta encurasha nos criadornan local pa pasa personalmente na e departamento aki y tuma informacion di con nan mes por planta hooi na nan tereno. Santa Rosa/DLVV tin un cantidad extenso di simia cu nan ta facilita esnan cu kier planta hooi na nan mesun facilidad. Pa mas informacion por tuma contacto cu Santa Rosa/DLVV via telefon of nan Facebook Page.