Dia 17 di mei ta un dia hopi special pa mundo henter cu ta bibando den e era di telecomuncacion. Dia 17 di mei ta observa mundialmente Dia Mundial di Telecomunicacion. For di 1969 e Union Internacional di Telecomunicacion a consagra 17 di mei como e dia pa conmemora e prome Convencion Telegrafico Internacional y Dia Mundial di Telecomunicacion.
Den e ayera historico tabata materialmente imposibel pa concibi informacion actualisa di acontecimentonan cu tabata yega cerca nos den cuestion di ora, dia y hasta lunanan di retraso.
Mirando e falta di comunicacion existente den e epoca ey, cu tempo a cuminsa aparece tecnologianan cu tabata purba di aserca e ser humano mas na otro. Generacionnan anterior a custuma cu teletippo, telegram, y, cu algo di suerte, radio y telefon.
For di telegraf te na fibra optico a pasa mas cu un siglo caba, pero na un velocidad cu, tin biaha, ta parce cu nos mes a biba nos infancia den edad medio. Asina grandi e avance tecnologico tabata den cuestion di un siglo. Nos a pasa di mira e posibilidad di ta cerca di un computer como un gran logro, pa tin mester di un computer, tablet of smartphone, pa por realisa cualkier tarea simpel den nos bida diario.
Mey mey di e evolucion informativo cu nos ta bibando actualmente, e ta necesario pa nos duna un importancia special na e balornan y categorianan cu mester wordo observa den tur momento.
Etica informativo, por ehempel, no ta un problema di moral individual, specialmente si ta considera cu e destinatarionan ta wordo orienta pa e medianan cu ta genera e informacion, y mi ta kere cu e asunto aki ta rekeri di un analisis mas grandi, mirando e naturalesa di loke cu awendia ta pasando den nos pais pa cu e aspecto aki.
Pa esnan cu ta dispone di e poder di medionan di comunicacion, e unico libertad cu ta existi ta esun cu nan mes ta genera. E libertad di expresion cu mester wordo respeta ta esun di nan mes.
Ora cu otro persona, cualkier otro, tribi na crea un noticia falso y comunica esaki den media, su accion ta bira un atentado na libertad di expresion. Libertad di prensa no ta nifica libertinahe y esaki ta loke cu awendia nos mester pone hopi atencion na dje, y como Gobierno nos lo delinia un maneho pa evita e mal uzo di medionan di comunicacion pa mal informa nos comunidad pa probecho personal di cuakier indole.
Nos Gobierno tin e compromiso di transforma e structuranan anticua pa cu nos leynan di comunicacion, cu no a pasa den cambio pa hopi decada. Creacion di leynan nobo, no solamente pa controla e dispersacion di mal informacion, pero tambe pa duna mas herment na e ciudadano comun di cuida su imagen publico. Pero tambe pa duna mas poder na instancianan, manera DTZ, di haci nan trabou ampliamente sin tin e necesidad di confronta constamente burocracianan innecesario y cu ta stroba un funcionario di realisa su trabou adecuadamente.
Pero pa nos por logra esaki nos lo bay tin mester di traha hunto y proactivamente y hasi di esaki un meta colectivo, pasobra ta asina so nos lo por logra e cambionan cu nos ta desea.
Nos tur ta rekeri di optimisacion di trabou, di talento, di esfuerso, pasobra solamente asina nos lo logra e cambio ta anhela pa nos Aruba stima, cu ta exigi, pa su transformacion total, e consagracion di tur ciudadano trahando den conhunto pa logra un mihor futuro pa nos generacion y tur esnan despues di nos.