Esaki ta un ley sumamente importante pa pais Aruba. E importancia tin di haber cu aspectonan di credibilidad financiero internacionalmente, e por duna un base legal na palabracionnan haci pa yega na finanzas duradero, pero tambe e ta toca aspectonan constitucional y nos autonomia financiero.
ORIGEN DI E LEY DI SUPERVICION FINANCIERO TEMPORAL
Mirando e importancia di e ley aki, nos lo estrena 5 clip informativo pa duna splicashon na pueblo riba e concepto di ley di supervision financiero temporal.
KONINKLIJK BESLUIT NO.20467
E origen di e ley di supervision financiero temporal ta data bek di 2014. Ta na 2014 cu Gobierno di Reino a duna sr. Mike Eman un Koninklijk Besluit pa “ondeugdelijk bestuur”. Specificamente por lesa bek den e decreto aki cu Gobierno di Reino ta bisa cu cifranan cu tawata wordo presenta den e presupuesto tawata irrealistico. Por lesa bek den e decreto tambe cu no ta Gobierno di Reino so a constata esaki pero IMF y “Raad van Advies” tambe a constata esaki.
PROTOCOL 2 MEI 2015
Debi na e decreto menciona Gabinete Eman 2 a firma un protocol riba 2 di mei 2015 den cual nan a bay di acuerdo pa bin cu un organo di supervision. E organo aki nos conoce awe bou e nomber di CAFT. Apesar cu Raad van Advies a bisa den nan conseho riba e ley original di 2015 cu e ta empugna cu nos Constitucion y nos Statuut. Fraccion di AVP den Parlamento e tempo ey a vota na fabor di e ley aki y de facto entrega nos autonomia financiero.
PA CONCLUI
Den e siguiente clip y articulo nos lo elabora riba e conseho di Raad van Advies riba e ley di 2015 y tambe splica con e organo di supervision y Hulanda a funciona for di 2015 te cu 2017.
E topico aki ta sumamente importante pa nos pueblo y e dushi pida baranca aki. Ta p’esey nos ta percura pa informa pueblo debidamente. No laga nos pais wordo dividi, ban uni, pa asina conforme e maneho di Gabinete Wever-Croes nos recupera nos autonomia financiero.
