Rudolf Arendstraat, Oranjestad: Diabierna pa mas o menos 8’or y 50 di anochi, presencia di polis ta wordo pidi cu urgencia na e lugar di bende loteria den Rudolf Arendstraat, pa un atraco arma cu lo a caba di tuma lugar.
Na yegada nan ta topa cu un dama di fam Brito basta spanta, ela splica cu polis cu ela bay pa paga e machin di Lotto y pa su sorpresa ela topa cu un homber color scur, cu un cuchi grandi para su dilanti. E homber tabata papia spaño y segun e dama e tabata bisti cu jeans preto y keds preto.
E atracador a logra baha na awa cu mas o menos 2500 florin di benta di lotteria y tambe cu un tas preto.
E dama victima di atraco no por a bisa den cua direcion e atracador a core bay. E dama tabata basta spanta y polis na e sitio mesora a opta pa pidi pa presencia di slachtofferhulp.
Atraco team tambe a presenta na e sitio pa haci mas investigacion.
Esaki lo ta e di dos atraco den un tempo basta cortico y aparentemente ainda e atracador di e atraco anterior no a wordo deteni.