Den e eleccion pa presidente di Panama diadomingo ultimo, sr. Laurentino “Nito” Cortizo di Partido Revolucionario Democratico (PRD) a gana e eleccion y asina e ta bay asumi e mandato presidencial entrante 1 di juli 2019. Sin duda cu partido MEP ta sumamente contento cu e victoria di sr. Cortizo ya cu ta trata aki di un di nos rumannan social democrata cu ta asumi presidencia di un pais. Di parti di MEP ta felicita sr. Cortizo pa cu e gran logro aki y nos partido tin e siguransa cu e presidente aki lo bay traha na beneficio di henter e pueblo Panameño.
Durante fin di siman ultimo relaciona cu e eleccion na Panama, partido MEP riba invitacion di e organisacion COPPPAL tambe a manda un delegacion pa fungi como observador na e eleccion aki. E observadornan aki, sr. Joe Koolman, sra. Stephanie Croes y dr. Gerrit Croes fuera di a haci un tremendo trabao pa yuda realisa un eleccion exitoso tambe nan a topa cu algun persona y ex-politico di Panama prominente. Asina nan tabata tin un encuentro cu ex Presidente di Panama (2004-2009) Martin Torrijos, cu Jorge Cortizo cu ta yiu di e presidente eligi y tambe cu Leonardo Camp cu ta encarga cu asuntonan internacional di PRD.
Di e forma aki tambe MEP a contribui na e exito di e eleccion presidencial y ta contento di a forma parti di e celebracion di democracia bibo na e pais Panama.