Algun dia pasa Minister di Labor y Asuntonan Social Glenbert Croes a anuncia cu ta bay hisa salario minimo cu 3%, esaki pa compensa e perdida di poder di compra. Segun lider di AVP mr. Mike Eman esaki ta un ahuste marginal compara cu e perdida grandi di poder di compra cu empleadonan a sufri cu e pakete di medida di gobierno. Den ausencia tambe di un crecemento economico e ahuste aki lo worde ainda mas marginalisa ora cu e comerciantenan aumenta nan prijsnan atrobe pa absorba e aumento aki. Asina nos ta cai dor di e medidanan y ausencia di cresemento economico den un desaroyo hopi negativo cu den economia ta worde yama un “loon-prijs spiraal”.
“Door di e medidanan di e actual gobierno nos a drenta den un situacion di inflacion grandi y un economia den un “downward spiral” hopi negativo cu repercusionnan pa loke ta poder di compra y y desaroyo socio ecoomico. Enbes di baha su gastonan gobierno ta saca mas placa di e cartera di e consumido y di comerciantenan cu medidanan cu ta sigui subi costo di bida y cu na nan turno ta stanca e poder di compra. Door di esaki ta surgi un spiral negativo di entrada vs prijs.
Eman ta substancia su ponencia cu e ultimo cifranan di CBS. Prijsnan di productonan pa e consumidor ta subi den forma alarmante. Pa hopi hende esaki ta nifica un baymento atras den nan poder di compra. Door di e Inflacion cumulativo di 2018 y 2019 e perdida di poder di compra ta yega na casi 10%. E aumento den e sector di comestibles segun Eman ta espantoso. E ta cita textualmente publicacion di e cifranan di CBS di maart 2019:
“Over the last twelve (12) months, the “Food & catering services” has increased by 10.5%. The “Food at home” index showed an increase of 12.4%. The “Potatoes and other tubers” index increased by 34.9%, the largest increase among the “Food at home” food groups.”
Spiral Salario-Prijs
Eman: “E medidanan cu a keda introduci na 2018 y 2019 door di e actual gobierno a causa un enorme inflacion. Prome cu Gabinete Wever-Croes casi no tabatin inflacion. Awor cu introduccion di e pakete di medida nos a drenta den un keintura di inflacion”.
Segun Eman no ta mas cu logico cu empleadonan ta exigi un compensacion den nan salario pa e aumento di prijs alarmante cu ta tumando lugar. Sin embargo, sin un crecemento economico e gastonan salarial ta bay subi mas lihe cu entradanan di comercio. Pa mantene nan cabez riba awa, e dunadornan di trabou lo pasa e gastonan aki pa e consumidor. E inflacion cu e medidanan a causa lo conduci di e forma aki na un spiral negativo di salario -prijs.
Deteoro social
E modus operandus aki pa MEP no ta nada nobo. Den pasado introduccion di BBO y otro medidanan di nan tabatin e mesun efecto. Medidanan ta worde tuma pa cubri nan gastonan operacional, no inversion, pasobra esey no ta tuma lugar den periodonan di gobernacion di MEP. Tur entrada ta bai na gastonan operacional y inversion den Pais y den poder di compra ta worde “gefreez” den periodonan di MEP. Esaki tabatin como consecuencia stagnacion di e economia di Aruba y deteoro fisico y social. Cu tempo ta mira tur cos ta bai atras y pueblo ta bira mas pober. Esaki ta ripiti su mes atrobe cu e gobierno aki.
Eman ta cita un bes mas di CBS pa loke ta e cifranan di e gastonan basico cu mester pa sobrebibencia (bestaansminimum) cu a aumenta enormemente den e ultimo dos añanan. E ta cita CBS su cifranan na December 2017 compara cu Maart 2019. “The subsistence level for a household consisting of two (2) adults and two (2) children (aged 0-14 years) in December 2017 is Afl. 4,338, while for a single adult household it is Afl. 2,066.The subsistence level for a household consisting of two (2) adults and two (2) children (aged 0-14 years) in March 2019 is Afl. 4,708, while for a single adult household it is Afl. 2,242.”
Gastonan di un un famia di 4 a subi a subi den menos di 2 anja cu casi Afl.400,= pa luna, loke ta suma riba base anual casi na 5.000,=. Pa un hende cu ta biba su so e gastonan a subi cu casi Afl. 200,= loke ta Afl. 2400,= pa aña. Segun Eman cu esaki no por ta otro cu e situacion aki ta bay conduci na un empobrecimento nacional.
Mester un cambio di rumbo
Cu e storia fabrica di un megadebe Gabinete Wever Croes a trata na hustifica e pakete di medida cu el a introduci. Aunke cu den campaña a priminti cu lo bay goberna sin medida, e actual gobierno a ataca tanto comunidad como comercio cu tur sorto di medida. Raportnan recien di CAFt ta mustra claramente cu e placa genera di e medidanan no a wordo usa pa baha gasto, pero pa financia gastonan di personal cu a subi grandemente. Mientrastanto ta kibrando economia di Aruba y e poder di compra.
Eman: “Un herencia igual di MEP a costa nos hopi tempo y energia pa den Dialogonan Social percura pa Aruba por a lanta cabez bek riba awa. Esaki a sosode cu inversionnan den poder di compra, economia berde, bon calidad di bida, infrastructura y renobacion di ciudad, bario y scolnan. Cu vision no a crea confiansa , adelanto y perspectiva pa futuro. Awe tur esaki ta worde kibra atrobe. Hunto nos lo mester salba Aruba for di e actual gobernacion”.