Parlamentario Endy Croes a tuma nota di un reaccion poco emocional di un candidato riba lista di AVP. E reaccion ta bastante ge-edit pa asina e por a expresa su mes cual ta su derecho. Parlamentario Endy Croes siman pasa durante un conferencia di prensa a termina repasando e famoso “bobbolist” unda alrededor di 400 consehero, candidato, coordinador, amigonan di AVP, incluyendo ex- Minister y Parlamentarionan di AVP a strica di nos digno pueblo un suma espantoso di 142 MIYON florin. Pues algo ABNORMAL. Den cuadro di su reaccion dicho candidato a splica cu “E” no ta “E” Giovanni Arends cu lo a cobra 570 mil florin. Tambe dicho candidato a splica cu Parlamentario Endy Croes lo a menciona cu e candidato di AVP aki lo ta coriendo campaña. Parlamentario Endy Croes ta keda para ariba cu Giovanni Arendsz tabata na San Nicolas dia 6 di april 2019 na Teresita Center y a hiba palabra den un reunion di AVP purbando di lanta pueblo pa bay manifesta y pues tabata campañando. Mi ta reta Giovanni pa contradeci esaki.
No a acusa ningun John Arendsz
Alabes por a tuma nota cu e candidato aki a bisa textualmente den su reaccion recien ge-edit, “ami no ta Giovanni Arends pero ami ta John Arendsz. Echo ta cu Parlamentario Endy Croes nunca a acusa ningun John Arendsz di lo a cobra 570 Mil florin. Pa aclaria esaki lo duna un splicacion mas amplio. Riba e “bobbolist” ta aparece bao di Bureau Minister President & Algemene Zaken (Mike Eman) Giovanni, Wagib Arends kende a cobra e suma di 570 MIL florin. Pues e Giovanni Arends aki a cobra 570 mil. Por conclui cu e declaracion di e candidato di AVP cu e ta John Frederick Giovanni Arendsz y pues e no lo ta Giovanni, Wagib Arends cu a cobra e suma aki. Banda di esaki a pone nos para keto un rato pasobra tin tambe algun tereno interesante liga na e Arendz aki y pronto lo divulga esakinan pa mira Giovanni su reaccion. “Je moet wel tegen een stootje kunnen” si bo kier ta riba lista politico.
Kantoornan di fraccion AVP bashi
Por a tuma nota tambe cu dicho candidato a pidi Parlamentario Endy Croes pa usa su tempo pa haci su trabao como un bon Parlamentario. Hustamente ta esey nos ta haciendo trahando 12 ora minimo pa dia incluyendo diasabra pa asina trece claridad di e desaster cu Mike Eman y AVP a laga atras como regalo pa nos futuro generacionnan. Mesun momento nos ta trahando duro pa cambia e leynan pa nunca mas AVP por abusa di fondonan y terenonan di pueblo na e manera di sinberguensa aki. Parlamentario Endy Croes ta invita e candidato di AVP aki “anytime” por pasa di bishita na Parlamento y lo ricibie porta habri pa dun’e informacion alrespecto tur e trabaonan cu ta wordo eherce y lo brind’e un tour den Parlamento pa mustr’e con tur pero tur kantoor di tur 9 Parlamentario di AVP ta bashi bashi sin ningun documento riba nan lessenaar simplemente pasobra nunca nan ta na trabao. Conociendo Giovanni como un bon deportista mi no ta kere cu Giovanni lo ta apoya e actitud di su coleganan. Kisas e candidato aki por stimula su coleganan di partido pa por lo menos presenta na trabao pa e placa cu nan ta cobra di pueblo.
Bobbolist 2
Resumiendo nos lo publica awe algun nomber mas cu tambe ta riba e “bobbolist” pa pueblo mes por huzga cu ta trata di puro berdad. Jean Louis Daquin 380 MIL, Antonius Aymon Kamperveen taxista amigo di Mike Eman y ta mesun persona cu ta den directiva di Lotto cu no kier baha a cobra cerca Mike Eman 300 MIL y apart ta stricando den Lotto, Benvinda Maria de Sousa otro cu a destrosa Lotto pa Deporte banda di e trabao aki tabata riba payroll di gobierno y a cobra 500 MIL florin. Segun ta necesario nos lo keda repasa e “Bobbolist” di 142 MIYON florin pa pueblo compronde cu nunca pero nunca mas AVP por bolbe na poder. Spera cu esaki a aclaria cualkier inkietud di nos amigo Arendsz.