Cu un tono hopi contento parlamentario Alan Howell a informa cu dia 25 di april lo habri e oficina di turismo un biaha mas na San Nicolas.
E oficina a wordo cera pa renovacion y e por a compronde for di minister di Turismo cu ta bay tin otro tipo di servicio, uno mas moderno y agresivo pa loke ta trata mercadeo di San Nicolas. Durante varios reunion publico, Alan Howell a haci peticion na minister Dangui Oduber pa e oficina aki habri bek mas rapido cu ta posibel. Lo uza e oficina aki tambe pa yuda atrae mas turista den e centro di San Nicolas.
Aki Howell a bisa cu Minister Otmar Oduber a traha for di den gobernacion pasa caba pa haci di San Nicolas e centro cultural di Aruba y den luz di e idea aki ta trahando duro pa e parti aki di nos isla haya e vibracion cultural aki.
Por mira e diferente pinturanan bunita cu tin rond, tambe por mira cu gobierno ta sigui haci esfuersonan pa habri museonan na San Nicolas pa ora tanto turista como local por bishita. No por keda sin menciona Srs. Tito Bolivar y Leon Berenos cu ta e personanan cu ta duna e tournan na San Nicolas, haciendo un tremendo trabou.
Tambe por a mira cu gobierno a informa recientemente cu lo restaura e edificio di Uncle Louis Store, lo cual ta un ehempel mas cu ta indica cu e concentracion ta bayendo bek pa San Nicolas, algo cu hopi, incluyendo Alan Howell mes, ta lucha tur dia pa logra.
No por a laga afo e anuncio tan spera di minister di Turismo pa loke ta e Island Fest cu lo inicia dia 29 di mei proximo. E Island Fest lo tin un concepto un poco diferente na loke tabata Carubbian Festival. E lo wordo teni na San Nicolas cada luna y lo bay tin un envergardura hopi grandi unda cu tur hende lo keda hopi contento na momento cu nan mira e producto cu lo wordo ofreci.
E prome Island Fest lo wordo dedica na Soul Beach, lo bay tin bendemento di cuminda, bebida y souvenirs manera tabatin anteriormente y pesey Alan Howell ta haci e peticion na tur esnan cu tabata bende nan producto antes, pa tuma contacto cu departamento di turismo pa wak con nan por uni tambe y haci di e evento aki mas exitoso ainda. “Lo cual nos ta desea ta pa San Nicolas tin un evento exitoso y si cada un di nos join y busca un manera pa engrandece, ta exitoso so e por ta. Nos ta den un gran espera di con e evento aki lo ta y sigur sigur cu e expectativa cu e ta bay ta mucho mas grandi y exitoso cu Carubbian pa trece mas hopi turista pariba di brug”, Alan a expresa.