Home Politics Parlamentario drs. Shailiny Tromp-Lee (MEP) ta subraya e importancia di pone nos...

Parlamentario drs. Shailiny Tromp-Lee (MEP) ta subraya e importancia di pone nos muchanan central cu enfoke ariba inclusion y ta contento di por a asisti na un otro actividad di ‘Bus di Alegria’

 

Banda di e trabou grandi pa loke ta trata Social Crisis Plan Minister Glembert Croes y Ministerio di Asunto Social y Labor simultaniamente ta sigui brinda actividadnan  cu enfoke principal riba nos muchanan. Nan ta organisa y brinda actividadnan educativo pa yena e bida di nos muchanan cu alegria. Manera minister Croes mes ta enfatisa, nan ta haci esaki cu e speransa di haci un impacto positivo ariba nos muchanan cu lo pone nan realisa cu e circumstancia di awe no mester defini nan mañan y cu e futuro ta den nan man.

 

‘Joepi Camp’ ta un actividad cu Ministerio di Asunto Social y Labor ta organisa y ta tuma luga den vakantie grandi. Aña pasa esaki tabata un exito total. Na oktober aña pasa Ministerio di Asunto Social y Labor a inicia cu e actividad ‘Bus di Alegria’ cu ta un actividad extra curicular. Bus di Alegria ta sali for di cada parti di Aruba unda cu e casnan social ta concentra.  E bus ta pasa un recorido den e respectivo districto unda cu un representante di e districto lo fungi como e Historiador. Nos tur sa cu cada districto di Aruba ta rico na historia y ki mas bunita cu comparti e conocimento aki cu nos muchanan. Ya caba e bus a pasa e.o. na Pardera, Noord y Rancho/Madiki/Playa Pabou. Loke mas ta resalta cada biaha ta cu e muchanan ta keda impresiona cu e historia di nan bario cu hopi biaha nan no tabata conoce. Banda di crea alegria e ‘Bus di alegria’ tin como meta pa inculca den nos muchanan e amor pa nan bario y lanta orguyo, respet pa historia y crea den e muchanan e lider cu lo sa di hiba su bario na un proximo nivel.

 

Dialuna 15 di april 2019 Parlamentario Tromp-Lee a asisti na un otro actividad di Bus di Alegria cu un biaha mas a termina na Parke Curason na Yaburibari den un bunita celebracion. E biaha aki a toca turno na tur nos muchanan special di Pasadia Bibito Pin y SVGA. Cada biaha ta yena mi di emocion y alegria pa wak e sonrisa sincero y pa experiencia e afeccion genuino cu nos muchanan special ta demostra y laga bo sinti. Enberdad nos mester enfatisa e necesidad pa percura pa nan inclusion y felicidad y percura pa esaki bira un realidad diariamente y ariba nivel nacional.

 

Mi kier felicita Minister Glembert Croes cu otro actividad exitoso y no kier a keda sin gradici e duo dinamico di Ministerio di Asunto Social y Labor cu ta Darlaine Guedez-Erasmus y Rochi Geerman. Dos persona cu banda di Minister Croes ta traha incansabelmente pa e gruponan mas lubida di nos comunidad y ta haci esaki cu yen di energia, dinamismo y amor.