ORANJESTAD – For di Fitch Ratings a ricibi e noticia cu e credit rating (grado di credibilidad financiero) di Gobierno di Aruba a wordo manteni. Esaki ta e resultado di un evaluacion teni door di Fitch Ratings den luna di maart caminda a papia cu varios actornan den gobierno y sector priva.
E ratings outlook, cual ta refleha e prospecto cu Fitch Ratings ta hiba pa un mehoracion di e rating den futuro immediato, a keda negativo. Esaki reflehando e debe halto y e hecho cu Fitch Ratings ta premira un crecemento economico conservativo den 2019-2020.
Fitch Ratings ta duna reconocemento na Gobierno di Aruba pa a mehora e deficit di 2018, esaki compara cu e aña anterior (esta 2017). Otro puntonan fuerte cu ta accentua e grado di credibilidad ta, e stabilidad politico, e grado halto di desaroyo y e relacionnan constitucional cu Hulanda.
Gobierno di Aruba, en particular Minister di Finanzas, Economia y Cultura, Sra. Xiomara Ruiz-Maduro, ta gradici tur esnan cu di un forma of otro a coopera na e resultado aki caminda, a pesar di e desafionan financiero grandi cu gobierno y comunidad tin su dilanti, a logra gana e confiansa di esnan cu tin di evalua credibilidad financiero di Pais Aruba.