Home Local Tips pa biahero durante temporada di vakantie di Pasco Grandi

Tips pa biahero durante temporada di vakantie di Pasco Grandi

 

 

ORANJESTAD – Como preparacion pa e temporada di vakantie di Pasco Grandi Departamento di Aduana ta duna e biahero local algun tips pa tene cuenta cune:

(*)Formulier Tijdelijke Uitvoer

Departamento di Aduana ta recomenda tur biahero pa registra articulonan practicamente NOBO manera laptop, cellular of tablet na oficina di Aduana na Aerocargo of na Aeropuerto. Esaki ta conta solamente pa articulonan di balor cu ta practicamente nobo y cu e biahero no tin e comprobante cu a cumpra esaki na Aruba mes of yega di cumpre afo y cu a paga impuesto riba e product caba. E formulario ta un comprobante cu e persona a sali cu e articulonan for di Aruba y e ta pa evita cu mester paga impuesto ariba e articulo na momento cu e bini bek Aruba. Tur biahero por download e formulario di Tijdelijke Uitvoer for di riba e website www.douane.aw. Yena e formulario delanta pero corda cu mester pasa registra esaki prome cu e biahe na oficina di Aduana na aeropuerto of na e seccion di Aerocargo pa e formulario aki por ta valido.

(*)Exoneracion di impuesto riba ekipahe di biahero:

  1. Nos ta conseha tur persona cu biaha pa exterior pa tene cuenta cu si cumpra articulonan den exterior pa warda tur comprobante di pago;
  2. Haci un calculacion di e balornan di e productonan;
  3. Si e balor di productonan surpasa 400 florin pasa directamente na balie di Aduana na aeropuerto pa paga impuesto di importacion y of accijns;
  4. No warda riba e control di Aduana riba ekipahe pa declara productonan cumpra;
  5. Pasahero por trece un cantidad limita di productonan manera alcohol y tabaco cu exoneracion di impuesto.

 

Biaheronan y importadornan (di carga) mester ta conciente di e reglanan prescribi den diferente ley encuanto importacion of exportacion di mercancia of transportacion di mercancia cu ta rekeri un permiso y/of cu ta prohibi por ehempel carni y medicamentonan.

Pa mas informacion encuanto preparacion pa biahero por bishita nos website www.douane.aw.