Home Politics Parlamentario Edgard Vrolijk (MEP): “Hopi orguyoso cu Cacique Macuarima lo bira...

Parlamentario Edgard Vrolijk (MEP): “Hopi orguyoso cu Cacique Macuarima lo bira e scol piloto pa innovacion”

SHARE

 

 

Awe a cuminsa e prome stap pa cambio den enseñansa. Enseñansa pa hopi aña a ser neglisha den tur forma, di mucha te docente y te edificio y cu consecuencia tambe riba nos calidad. Nos cuerpo di docente dia pa dia ta traha den situacion dificil y riesgo pero tambe nos hobennan ta hayando les den un sistema cu a keda pega y no a evoluciona. Nos ta dunando les na e manera cu nos mes a haya les y cu no ta atrae nos muchanan mas, mientras nos ta produciendo studiantenan cu mayan no por haya trabao pasobra hopi trabao no ta existi mas y nos muchanan no ta prepara pa adapta na cambio y sigur globalmente nos a keda atras.

 

Campaña

Di 2012 cu mi a drenta arena politico mi a hiba como lema ci nos tin di bay na e Next Generation. Esey kiermeen cu nos mester bin cu cambionan den nos curiculo y tambe nos manera di duna les. Pa logra esaki mester inverti den mehora e infrastructura pero tambe den conocemento di nos docentenan y sigur pa regla nan posicion huridico p’asina por tin e cuerpo motiva pero tambe pa motiva mas hoben pa studia como docente. Y e cambio di curiculo mester ta basa riba brinda e hoben conocemento combina cu abilidadnan cu lo yud’e pa por adapta den un futuro den tur trabao (21 century skills). Y den e fase aki innovacion ta hunga un rol importante.

 

Proyecto

Manera cu mi a haya e oportunidad di drenta parlamento e idea aki a sigui su rumbo pero door cu mi persona ta parlamentario, mi no por percura pa ehecuta un proyecto piloto. Pero ora bo ta traha cu bon intencion bo ta haya bek cosnan positivo. Y den esaki Promer Minister Evelyn Wever Croes bao di cual Innovacion ta cay a haya e proyecto aki uno cu FUTURA por percura pa e por haya forma y sigur cu e inclusion di un facultad na Universidad di Aruba yama SISTEM, ta haci mas necesario pa nos muchanan topa cu ciencia, tecnologia, engineria y matematica pa stimula mas mucha pa por bay studia e direccion ey pero sigur ta exigi cambio den curiculo pa por acopla cu e facultad aki. E facultad aki ta hopi importante pa nos por crea mas young professionals pa bira entrepeneurs.

 

Cacique Macuarima School

Cacique Macuarima lo bira e scol piloto pa innovacion. Hopi orguyoso di un scol y un bario humilde cu merece e oportunidad di por yega mas leu. Via educacion nos por haci mas pa nos hubentud. Y esaki mester ta e comienso pa por sigui expande e proyecto aki rond Aruba pa brinda tur mucha e oportunidad di por haya un educacion cu ta adapta na e tempo cu nos muchanan ta bay scol pero tambe un educacion cu e hoben lo por haya un trabao pero tambe por adapta den diferente funcion.

Pabien na Gabinete Evelyn Wever Croes y sigur nos Promer Minister cu a kere den e proyecto aki y su necesidad pa comunidad y awo e ta keda den man di nos Minister di Educacion Rudy Lampe pa ehecuta esaki den diferente scol den plan nacional 2030 pasobra di parlamento bo ta duna bo ideanan y semper manera ta e caso aki cu bo voz ser scucha.

Pa termina masha pabien Cacique Macuarima y henter bario y ban conscientisa y duna balor na nos educacion pa e muchanan di bario pa por probecha y haci bon uso di scol pa por yuda nan den tur nan retonan diario. Educacion ta e unico vehiculo cu por yuda mehora den subimento riba e trapi social.