Diahuebs 4 april, Minister dr. Armando Rudy Lampe a reuni cu cabesantenan di scolnan publico, na unda cu diferente temanan a wordo trata. Interesante tabata pa nota cu e tabata un dialogo hopi habri na unda cu tur esnan presente por a vocifera nan retonan cu nan ta biba cu ne na nan respectivo scol.
Diferente puntonan a wordo trata a base di un agenda cu ya a wordo stipula. Den un forma hopi profesional e cabesantenan a trece nan preocupacion y sugerencianan pa asina aki, conhuntamente yega na consensus cu otro y semper cu e pensamento cu e mucha mester ta central.
Diferente di e cabesantenan a expresa cu nan ta hopi satisfecho cu Minister di Enseñansa ta sinta cu nan y ta hiba un dialogo habri, na unda cu diferente tema di interes ta wordo trata cu hopi seriedad. Na final tur esnan presente a keda hopi satisfecho y a gradeci Minister pa su disponibilidad y a recorda Minister Lampe cu dialogonan lo sigui y cu semper Minister ta bon bini pa sinta hunto pa yega na cualkier solucion, ora esey lo ta necesario.