Noord: Diadomingo un poco despues di 4’or di marduga, presencia di polis ta wordo pidi cu hopi urgencia na Lekker Bar & Restaurant, pa motibo cu dos gang di hoben lo kier a bringa cu otro.
Mesora ta manda varios patruya di Noord y Santa Cruz na e sitio. Na yegada nan ta bin compronde cu ta trata di hobennan di e gang di Sabana Basora Noord y un otro gang di hobennan lo kier a bringa cu otro.
E patruyanan di polis a yega na ora pa asina por a evita e bringamento aki. E polisnan mesora a cuminsa core tur hende for di e sitio y despues a bay over na cera Lekker Bar & Restaurante tambe, pa asina evita mas problema, pasobra constantemente polis ta hayanan cu varios asistencia na e bar aki.
Polis a keda warda te ora tur hende bay for di e sitio y e lugar tabata completa cera pa nan por a sigui cu nan patruya.