Diferente ta e estudionan y recomendacionnan cu e instituto aki ta dispone, riba e tereno di hobennan.
NJI ta un instancia cu ta envolvi tambe den e taskforce di Reino pa loke ta educacion di mucha. Pues e instituto aki tin un conocimento amplio di kico ta e problematicanan cu nos ta encontra den nos respectivo paisnan. Den e cuadro aki cu Minister Glenbert Croes conhuntamente cu Sra. Sue-Ann Ras y e directora di Departamento di Asunto Social Sra. Glenda Hernandez, a reuni cu e NJI pa busca mas conseho y conocimento riba e materia aki, semper cu e fin pa por aplica e miho formula, pa un exito garantisa, pa nos hobennan cu ta sin trabou y/of cu a opta pa no continua cu scol. E consecuencia awe ta cu e desempleo bou di hobennan ta espantosamente halto. Consciente di esaki, e mandatario ta buscando e caminda pa cana, e formula di exito, pa por resolve e problematica aki cu Aruba ta enfrentando.
Den un esfuerzo conhunto entre Instancianan, Gobierno di Aruba y e propio hobennan, nos lo logra hunto reconstrui nos Pais cu tanto tin mester di dje y di nos tur pa por logra esaki.
