Parlamentario Endy Croes a revela cu no ta tur cos lo keda scondi pa semper. Duna tempo tempo y poco poco nos ta conoce mas di e desaster den Lotto pa Deporte. Recientemente nos a logra pone man riba un Rapport Jaarrekening traha door di Ernst & Young alrespecto aña 2010, esta hustamente e aña cu Parlamentario Endy Croes e tempo aya a wordo manda cas unda a cuminsa un investigacion riguroso cu un persecucion politico nunca bisto. Nos tur por corda e show cu AVP a arma desde 2010 en adelante. Tristo pa mira con nan a haña un Fundacion cual tabata contribui na tur facilidad deportivo, construi parkenan nobo y tabata duna nos atletanan un sosten incondicional generando suficiente fondo.
Abuso cu placa di deportistanan
Activistanan di AVP nombra pa Mike De Meza y Mike Eman a secuestra Lotto y a haci Lotto un Fundacion pa haci negoshi propio. Tur e miembronan di directiva a coopera cu otro y algun tabata strica miles di florin pa extra servicio cu un of otro compania di nan mes brindando servicio na Lotto. Nan mes tabata paga nan mes. Por ehempel IT Pro di Arnold Legrand amigo di cas di De Meza. Abogado Da Sousa tabata paga su mes y asina tur di un of otro manera tabata abusa di e fondonan cu mester a bay pa nos deportistanan. Den e jaarrekening por tuma nota riba pagina 29 bao di e capitulo General Expenses den aña 2010 Bestuur di AVP a malgasta na un manera inexplicabel y na un manera di un set di sinberguensa un total di 3 MIYON florin. Den e mesun Jaarrekening y riba e mesun pagina ta compara aña 2009 pa cu e gastonan general. Esaki a suma Afl. 882 MIL florin. Pues Bestuur di AVP a usa mas di 2 MIYON florin pa investiga entre otro ex Director Endy Croes cu un meta pa complace hopi amigo. No mester lubida cu entre otro Luci Peterson (abogado) ta casa di Baba Herde, Da Sousa casa di Desiree Croes tambe ta abogado kendenan a cobra. Por tuma nota cu un suma di 700 MIL a wordo paga na abogado den 2010 mientras un otro suma di 650 mil a wordo paga na compania E&Y. Un otro suma di 400 mil a wordo paga na un otro compania Security Management and Investigation di un tal Antersijn masha amigo di Mike de Meza. No mester lubida cu ex minister Bermudez amigo di Mike Eman tabata co-doño y partner di E&Y. Pues 1+1=2.
Boso no tin berguensa ni gevoel?
Pues hopi cla por tuma nota di un plan “macabre” di Mike Eman pa formula un percepcion den pueblo tras di algun hende pa por “horta” na un forma legal – tras di e nomber investigacion – MIYONES di placa di nos deportistanan. Tin masha hopi documento awor den nos poder cu e Bestuur actual di AVP no por scapa. Nan prepara pa bay defende nan mes dilanti husticia. No ta manera pa “horta” Lotto pa Deporte. Por ehempel Flavio Faneyte un hefe na Elmar tambe ta hinca den e presunto ladronicia aki. Ta ki confiansa Elmar por tin den un hefe asina? Silvio Janga un pensionado amigo di Mike de Meza tambe tabata firma chequenan pa complace su amigonan den Bestuur. Otro pensionado Eli Kock no tin berguensa? Kico por a pasa den boso cabes pa causa un desaster asina cu fondonan di Lotto? Kamperveen otro pensionado amigo di Mike Eman, bo no tin berguensa of gevoel?
Keda pendiente pasobra nos tin documento pa yena corant henter aña 2019. Benvinda Da Sousa ya caba a core entrega retiro. Mi lo anticipa cu e otronan lo entrega retiro promer cu veredicto di hues 8 di mei proximo. Nos ta preparando pa un investigacion y esnan cu a faya lo mester haya. Parlamentario Endy Croes hopi indigna cu e abuso cu a tuma lugar cu placa di nos deportistanan. Keda pendiente!