Santa Cruz, Rooi Frances: Diasabra algo pasa di 10’or di anochi ta sosode un accidente riba e caminda di Rooi Frances, tambe a drenta informacion adicional cu e chauffeur kier bandona e sitio y cu e ta basta bou influencia.
Na yegada polis ta topa cu un Kia Picanto Blanco, e chauffeur bisti den su trahe di Mariachi, enberdad e tabata basta bebi, aparentemente elo a canta y bebe di mas na un of mas fiesta cu nan a toca.
Na e sitio tambe nan a bin compronde cu ta trata di e mesun Kia Picanto cu un rato prome a hit and run un auto banda di e Supermercado Fayan na Santa Cruz.
El Mariachi lo tabata di paranda, no a para pa su responsabilidad na Santa Cruz, pero su paranda no a yega mucho leu paso den Rooi Frances ela dal contra un pickup, tambe e kier a bandona e sitio, pero e auto a haya demasiado daño material, cu e no por a sigui core. Polis mesora a detene El Mariachi y a pidi pa transportwagen.
Den e pickup tabata tin un ocupante, e tabata levemente herida, polis a pidi pa presencia di ambulance, na yegada personal di ambulance a trat’e na e sitio y despues a transport’e pa hospital pa un checkeo medico mas avansa.
E situacion a bira poco tenso na momento cu famia di e chauffeur di e pickup a yega na e sitio y a topa cu e ocupante di e pickup herida y a bin compronde cu ta un chauffeur bou influencia a ocasiona e accident aki, nan kier a bay regla cuenta cune, pero polis mesora a interveni pa asina cos no bay for di man na e sitio.
El mariachi a wordo transporta cu transportwagen di polis pa warda di polis na Santa Cruz y su Kia Picanto a keda confisca y cu takelwagen hiba Warda di polis.