Den un articulo recien sr. Mike Eman ta insinua cu partida di e oncologo Jonkhoff ta hinca cuido medico na Aruba den peliger, specificamente atencion pa pashentnan cu ta sufri di e malesa cancer. Sr. Mike Eman ta insinua cu esaki ta falta di gobierno y pa crea simpatia pa su mes persona el a pone un potret di su mes na hospital cu un mucha hopi malo pa compaña e articulo.
MANIPULACION DI SR. MIKE EMAN
Ta increibel pa wak cu sr. Mike Eman kier manipula pueblo aworaki no solamente cu cifranan fictisio of mal uso di logonan y informacion falsifica di Centrale Bank van Aruba, pero Mike Eman kier manipula aworaki door di usa dolor di esnan cu ta sufri di e malesa cancer.
Partida di oncologo Jonkhoff na un manera abrupto a wordo frena door di Minister di Salubridad Publico actual sr. Dangui Oduber. Ta trata un malcontento entre e oncologo en cuestion, raad di Hospital y Hospital cu ta data bek for di 2014. Ta importante pa raad di Hospital y of directie di Hospital mes contra aresta sr. Mike Eman pa asina trankilisa pueblo bek.
ARUBIG
Sr. Mike Eman kier manifesta y su motibo ta kiezersbedrog. Djis pa toca un di e 35 mentiranan di Mike Eman lo elabora riba Arubig. Sr. Mike Eman a priminti cu e lo regla e aspecto aki pa yiunan di tera cu a studia den region por traha bek na Aruba. Pero envano!
Sr. Dangui Oduber a splica cu e proceso ta canando hopi bon y su Ministerio y e stakeholdersnan ta convenci cu lo yega na otro e aña aki. Es decir e aña aki ainda yiunan di tera cu a studia den region por bin eherce nan profesion na Aruba. Asina realisando loke Mike Eman no kier a ehecuta pa 8 aña largo.
CUIDO MEDICO BOU MANEHO DI SR. DANGUI ODUBER
Na e momento aki ya caba tin un otro oncologo permanente den servicio di Hospital y esaki lo wordo amplia e aña aki cu 2 mas.
E proyecto di ampliacion di IMSAN na SN lo keda cla fin di aña. Resultado concreto di esaki lo ta 45 cupo di trabou, un inversion di 60 miyon florin na SN y un “afdeling” di radiologia pa atende 400 pashent anualmente cu ta sufri di cancer na Aruba mes.
PA CONCLUI
Nos ta haci un apelacion fuerte na sr. Mike Eman pa no manipula pueblo mas y mucho menos cu dolor di famianan y esnan cu ta sufri di e malesa cancer. For di 2009 e proyecto di IMSAN tawata cla pa ehecuta pero Mike Eman a escohe pa no haci esaki.
Stop di crea desunion den pueblo, bin Parlamento Mike Eman pa bo por atende reunionnan y ta bon informa. Pa asina bo tambe contribui na bienestar di pais Aruba, aunke bo actonan di destruccion y sembra desunion den pueblo ta pone nos duda cu bo stima Aruba.