ORANJESTAD – No ta un secreto cu comunidad continuamente ta desaproba desaroyo descontrola y destruccion di naturalesa den medionan social y por medio di NGO’s. Segun parlamentario Daphne Lejuez, a yega ora pa tuma inventario y trata cu e asunto di otorgamento di tereno pa hotel apropiadamente.
Manera conoci, riba 20 di april 2018, Parlamento di Aruba a aproba un mocion pa Gobierno di Aruba institui un Kosten-Baten analyse. Unda cu lo mester compara e costo di anula compromisonan pa proyectonan hotelero haci, versus e costo y consecuencia pa nos comunidad di tur e personanan adicional pa cada camber di hotel, y pa manda e resultado aki pa Parlamento di Aruba, asina esaki keda cla.
E intencion di esaki semper tawata pa haci esaki prome cu duna autorisacion na diferente proyecto cu gobierno anterior lo a otorga, y no despues cu nan keda anuncia, segun parlamentario Lejuez. “Ya caba nos ta wordo bombardia regularmente den media cu diferente proyecto cu supuestamente no por wordo para mas den areanan di Palm Beach, y tambe incluyendo awo uno cu a wordo anuncia den area di Seroe Colorado di 900 camber,” parlamentario Lejuez ta comenta.
E problema segun Parlamentario Lejuez, no ta e tipo di hotel, ni cu e ta un bon ‘brand’. “E problema ta cu mester para keto un rato y tuma inventario di berdad enbes di keda hunga monopoly cu otorgamento di tereno pa hotel, sin considera e efectonan socio-economico di tur e proyectonan aki hunto pa nos comunidad den un timeframe relativamente cortico,” Parlamentario Lejuez ta bisa.
Mocion
Si en berdad gobierno anterior a otorga esakinan, kico ta bay haci pa stop esaki? Cuanto e lo costa pa para nan vs e costo pa nos comunidad? Esakinan ta preguntanan clave cu Parlamentario Lejuez ta trece dilanti. E mocion presenta na 2018 ta concentra riba e puntonan tambe cu e efecto financiero di posibel expansion di camber hotelero lo por hiba na mas persona for di exterior pa traha den e sector aki, cu tambe lo mester un vivienda, auto, scol pa nan yiunan, cuido medico y mas. Nos careteranan tambe ya ta bastante congestiona, tin listanan di espera largo pa cuido medico specialisa, e gastonan actual di AZV no ta sostenibel y tin cantidad di alumno den klas di scol desproporcionalmente grandi.
“Spera nos haya contesta riba nos mocion a corto plaso pa por compronde ki opcion nos tin como Pais, sigur prome cu tur proyecto keda aproba,” e Parlamentario ta bisa.