Mas accesibilidad pa yega Djiespi’s Place
Trahando hunto pa yuda esunnan cu limitacion fisico
ORANJESTAD: Desde luna pasa Parlamentario Robert Candelaria (AVP) ta trahando riba un proyecto pa hendenan cu limitacion fisico. E aña aki el a participa den e di 7 proyecto di Aruba Doet y a traha riba un rampa na Djiespi’s Place na final di Caya Betico Croes. Diabierna anochi tur hende por a admir’e ora cu a inaugur’e. Tur diabierna anochi tin fiesta na Djiespi’s Place y Robert Candelaria tabata presente pa celebra cu tur presente.
Den e ultimo 2 dianan Robert Candelaria y su team a traha duro cu hopi satisfaccion. Hopi hende a yega pa mira, pero tambe a join pa traha den un ambiente ameno. E intencion no ta pa tin esaki so, pero a disfruta di e fiesta y a combersa. Mas importante ta cu a scucha esunnan den rolstoel, hendenan cu no por move mes facil cu nos.
A ricibi un lista di luganan cu e personanan aki kier pa bira accesibel. Esaki a pone cu a cuminsa dal e pasonan cu pa nan ta halto. Ta importante cu tur compania, tur fundacion, tur organisacion den nos comunidad cu tin mester di ta accesibel, pa nan tambe dal e paso pa construi rampanan special.
Por a mira e anochi aki un otro proyecto di Aruba Doet, a traha un rampa di palo movibel, pa por yega kita y pone. No mester ta grandi ni profesional asina, pero por traha un simpel mes. Cada un a pensa con pa yuda esunnan cu tin menos facilidad di move manera nos. E idea ta cu nan calidad di bida mester ta mescos cu di tur hende.
Loke cu ta importante ta pa haci’e hunto cu comunidad. E lista di luganan cu ta desea pa ta mas accesibel ta inclui luganan pariba y pabou di brug, entre otro Setar y Postkantoor. A acerca DOW y pidi e condicionnan, kico ta locual mester cumpli cun’e pa por traha e rampanan.
Fraccion di AVP a haci e proyecto aki hunto cu Aruba Doet. Ta importante cu mas organisacion traha hunto y ta envolvi, ta plama e conscientisacion di e otro proyecto di rampa mobil. Asina mester sigui, traha hunto cu otro relacionnan, plamando e mensahe. Haciendo asina aki ta motiva y stimula otronan pa nan tambe join e movemento.