Durante tratamento di Presupuesto di DOW pa 2019 varios Parlamentario a haci uzo di e oportunidad pa trece nan preguntanan dilanti ta trata 70 pregunta. E preguntanan haci tabata varia entre lista di prioridad di proyectonan di DOW, siguridad den trafico, construccion y mantencion di edificionan di Gobierno manera entre otro scolnan, pero tambe e ley di LRO y maneho di ROP. Minister di Desaroyo Teritorial Infrastructura y Medio Ambiente Otmar Oduber a duna splicacion amplio riba e diferente temanan y a pone documentonan disponibel pa miembronan di Parlamento por revisa.
Preguntanan relaciona cu Ruimtelijk Ontwikkelingsplan (ROP) a bin dilanti varios biaha door di diferente miembro di Parlamento pa cual Minister Oduber a splica e proceso encamina. 8 luna pasa a reuni cu e organisacion Camara di Comercio (KVK) riba e topico aki. KVK mes tabatin diferente sesion cu e grupo di trabou di Gobierno y e expertonan di Hulanda di Adviesbureau RHO. Mas di 47 organisacion a wordo consulta y a organisa encuentronan (townhall meetings) pa brinda e oportunidad pa ciudadanonan ricibi contesta riba nan preguntanan, serie di reunionnan a tuma luga cu instancianan y a haci encuesta riba media social riba preocupacionnan entre otro. Minister Oduber a splica miembronan di Parlamento cu KVK tabata na altura di e deadline y incluso a publica/ recorda nan miembronan di esaki. Pa cual ta haye lamentabel cu tres dia prome cu e deadline e organisacion ta organisa un townhall meeting sin inclui e departamentonan di Gobierno cu por brinda e informacion corecto na e ciudadanonan. Y pa a base di e encuentro aki ta saca conclusion cu tin falta di informacion y a haci peticion di extension di e deadline. Minister Oduber ta considera e reaccion di comunidad uno satisfactorio caminda cu mas o menos 80 carta a wordo entrega. Na 2009 e cantidad tabata zero, cual ta mustra cu tin crecemento den conscientisacion den comunidad pa locual ta e tema aki. Tin personanan cu a entrega documentonan di 300 pagina y otronan cu a entrega 1 pagina den zienswijze. Tur esakinan ta wordo tuma na consideracion. Minister Oduber a bisa.
Minister Oduber a sigui splica cu tur informacion di e concepto di ROP a wordo poni riba website di DIP y den biblioteca di MFA nan rond Aruba pa hacie mas accesibel pa personanan intersa den e informacion pero cu pa un motibo of otro no por yega na DIP. Ora cu wak e peticionnan, un porcentahe halto (80%) di esnan cu a entrega carta ta trata di pesonanan cu kier desaroya den areanan protegi pa ley. Minister Oduber a accentua cu ora cu ta atende cu e ley di Landsverordening Ruimtelijkeontwikkeling (LRO) y e maneho di ROP mester atende cu ne na serio. Hopi biaha ta papia di proteccion di medio ambiente, pero ora cu ta toca interes propio, eorey ta haya personanan cu no ta di acuerdo cu ne.
Concluyendo Minister a accentua cu e maneho aki ta para pa reparticion di espacio teritorial teniendo na cuenta nos medio ambiente / flora y fauna y tambe ta percura cu por tin desaroyo den areanan cu ta sinti cu por desaroya. E maneho di ROP ta determina a base di di consultanan cu a tuma luga y a base di balor cu expertonan ta pone na teritorio di nos Pais.