Marnixstraat, San Nicolas: Diaranson den oranan di mainta a sosode un caso hopi tristo y cruel den Marnixstraat na San Nicolas, dos cacho a wordo mata cruelmente y cu sanger frieu, pa un supuesto psichopata, cu sigur tin problemanan mental hopi serio. Mescos elo por a tira riba hende of muchanan inocente tambe.
Den oranan di mainta e doño di e cachonan a sali pafo y a haya falta di su dos mascotanan stima, mesora a bay buscanan, pa mira pakiko nan no ta na cas.
Na dado momento e doño di e cachonan ta bin topa cu un sorpresa hopi amargo, e ta haya tur dos su mascotanan stima morto, un tabata benta den cura di bisiña y e otro lo a wordo tira hopi mas despues. Mesora e doño a pidi pa presencia di polis.
Na yegada e agentenan ta topa cu e doño di e cachonan y ta mira enberdad cu ambos cacho a wordo tira cu un arma di candela pisa.
Segun nos a compronde, un di nan tabata tira for di hopi tempran y e otro tabata tira no mucho rato pasa, paso ainda su curpa no a bira stijf.
No ta conoci ki ora exactamente e cachonan aki a wordo tira y sigur ni kiko por a pasa den un persona su cabes, pa por a comete e acto cruel aki, cu e dos bestianan inocente aki.
Algun bisiña tabata comenta cu tin varios hende cu arma di candela eybanda y cu nan sa los tiro, pero e biaha aki, nan a bay asina leu caba di los tironan fatal riba dos cacho inocente. Probablemente lo ta un persona cu no ta bon di cabes a haya un arma di candela den su poder y cu deseo grandi di mata un ser, a dicidi di tira riba dos cacho inocente cu no por defende nan curpa.
Un situacion hopi cruel pa mira y por a scucha hopi comentario di bisiñanan hopi disgusta y tristo di loke a pasa cu e dos cachonan aki, ta trata di un area habita, caminda tin hende grandi y muchanan ta cana.
Presencia di Departamento Tecnico di polis y recherche tambe a wordo pidi na e sitio pa cuminsa cu nan investigacion pa asina por yega na e persona of personanan cu a comete e acto cruel aki.
Polis ta pidi ken cu por a mira algo pa yama mesora e tiplijn di polis 11141
Nos di arubanative.com ta condena e acto aki y ta spera cu pronto autoridad por pone man riba e elemento cu a comete e acto cruel aki.