Durante conferencia di prensa ultimo, Parlamentario Sue-Ann Ras a elabora riba algun ehempel di e proyectonan di Sociaal Crisis Plan, cu ta considera como proyecto intangibel. ‘Nos ta custumbra cu proyecto tangibel, manera infrastructura, embeyecimento, pues algo cu bo por wak. Y actualmente e gobierno aki ta concentra riba proyecto intangibel, unda e enfoke ta riba ser humano. Y esey ta netamente loke Sociaal Crisis Plan ta encera”, e parlamentario a cuminsa na clarifica.
Bureau Sostenemi
A indica cu un di nan problemanan di mas grandi tabata door di falta di trahador. Via Sociaal Crisis Plan nan a logra haya 6 trahador y den luna di juni y juli a haci e fase introductorio. For di juni a parti e casonan den 4 forma, unda a scoge pa un sistema di triage, cu ta pareci na esun di Veilighuis na Hulanda: rood 1 – rood 2 – rood 3 – rood 4, unda cu cada trahador ta haya un maximo di 25 caso. Meta di Bureau Sostenemi ta pa fin di 2019 elimina tur lista di espera. “Pues nan ta trahando riba e lista di espera y riba loke ta drentando diariamente. Djis pa indica, rood 1 ta indica ‘peliger mesora’ y nan a keda cla cu e casonan aki y a cuminsa traha riba e casonan di rood 2. Tin alrededor di 70 caso di famia cu nan ta bezig ainda cu nan. Ta alarmante e casonan di mucha ilegal cu ta drentando, mirando cu esaki ta aumenta. Tin alrededor di 30-40 caso, unda nan no tin seguro y ta dificulta e proceso pa brinda asistencia. Esaki sigur ta un punto di atencion urgente pa nos, pa evita cu e mucha no ta ricibi e ayudo y proteccion necesario” Ras a indica.
Jeugdreclassering
Na Aruba banda di tin aumento di criminalidad hubenil, tin tambe e señalnan cu e delitonan bou di hoben ta mas pisa. Den periodo di 5 aña; 2013 – 3017 tin un aumento bisto den e delitonan pisa bou di e hobennan y esaki ta segun dato di Ministerio Publico. Ta trata di delito di violencia, ladronicia bou di circunstancia grave y intento di homicidio y aumento di posicion di arma bou di hoben tambe a aumenta. Segun Ras “Ta mediante fondo y meta di Sociaal Crisis Plan e departamento di Jeugdreclassering porfin por a cumpra varios test cu pa hopi aña nan tabata boga pa haya. E testnan ta entre otro: test psicologico, test di personalidad, test di IQ, test di trauma. Actualmente ta papia cu tin 50 hoben cu tin mas di 10 ‘criminogene factoren’. Esaki ta un grupo hopi vulnerabel y nos ta bezig ta analisa con por atende e situacion aki”.
Imeldahof
Nan a indica cu tin hopi problema social emocional cu nos muchanan y tocante e cultura di straf. “Nos mester cambia loke ta cultura di straf y bay mas den e direccion di disciplina consciente. Esaki ta rekeri un fase di hopi informacion y disposicion, pa cambia cierto actitud y casi tradicion of custumber pa loke ta trata educacion di nos muchanan,” Ras a amplia. E programanan cu Imeldahof a bin cu ne den Sociaal Crisis Plan ta:
- Terapia creativo: na januari 2017 a cumins’e pa un periodo di 3 luna, pero a stop cu ne, door cu e terapista a bira malo. Awo lo inicia bek cu ne, unda lo tin 10 mucha den e programa.
- Yoga: na 2019 lo inicia cu 8 mucha cu lo participa na 12 les. Ta trata di un tecnica di mucha unda lo inculca forma di concentracion y relahacion. Ta un forma di ‘self-regulation’, unda e muchanan por relaha y sinti nan sigur.
- Meditacion: meditacion ta mundialmente conoci pa ta un excelente herment pa aplica. Incluso tin varios scol na diferente parti di mundo, cu ta incorpora meditacion den nan curiculo escolar. E efectonan ta super beneficioso y p’esey mes Imeldahof kier incorpora esaki, unda e muchanan lo siña e tecnicanan di relaha.