Aruba ta pasando den momentonan sumamente dificil, p’e abuso financiero di e Gobierno anterior, y e negligencia social di Gabinete Mike Eman. E sector mas vulnerabel socialmente ta e.o. nos hobennan cu ta bandonando scol y cu no ta terminando un scol secundario. Pa e motibo aki nan no por haya un trabou cu por sustentanan. E consecuencia di esaki ta cu hopi ta coy e mal rumbo.
Considerando tur esaki y pa bienestar di nos hobennan, Gabinete Wever Croes a dicidi di continua cu Formacion Social, Sociale Vormingstraject, pero extendiendo y expandiendo e trayecto aki cu oportunidad real y berdadero, pa e mucha homber di entre 18 cu 24 aña, cu no a caba un scol secundario.
E prome aña e hoben lo pasa e trayecto di Formacion Social cu ta concentra riba su formacion personal. Antes tabata e caso cu e trayecto aki tabatin duracion di un aña so. Consecuentemente e hoben tabata cay den bashi na final di e aña, sin por a haya un trabou despues, cu tur su consecuencianan. Pues e trayecto di Formacion Social no tabata logra su meta completo.
Minister Glenbert Croes su vision pa cu Formacion Social ta bay mas leu. Awor ta brinda e hoben e oportunidad, pa despues di e trayecto di Formacion Social, bin na remarca pa un carera den Arumil brindando e hoben e oportunidad di un contracto di 4 aña.. Si despues di e 4 añanan, e hoben no kier continua cu un carera den Marina Real, Gobierno di Aruba ta compromete su mes di duna e hobennan aki un oportunidad di trabou sea den CEA, KIA, KPA, GNC, Brandweer, AAA, APA of otro instancianan, caminda cu nan por aplica locual nan a siña den Formacion Social y AruMil na servicio y seguridad di nos Pais.
Diahuebs proximo tin un programa special na Tele Aruba cu ta duna informacion extenso di e trayecto di Formacion Social. Pa mas informacion por acudi na e pagina di facebook Formacion Social -SVT.
Gabinete Wever Croes ta comprometi cu Aruba.