ORANJESTAD – Diaranson 20 di maart a tuma lugar un reunion entre Minister di Turismo sr. Dangui Oduber y e comision di turismo di Parlamento. Den e Reunion aki a presenta e “Master Plan Turismo 2021” na e miembronan di Parlamento. Parlamentarionan presente den e reunion tabata sra. Louisette Christiaans-Yarzagaray como e presidente di e comision, sr. Alan Howell, sr. Richard Arends, sra. Jennifer Arends-Reyes, sr. Endy Croes, Daphne Lejuez, sr. Rocco Tjon, sra. Mervin Wyatt-Ras, sr. Hendrik Tevreden.
Den e reunion aki a toca temanan hopi importante y parlamentarionan presente tabata tin e oportunidad pa haci pregunta y duna nan punto di bista na Minister Oduber. E Minister di su banda a presenta su maneho y su vision na e comision pa loke ta e “Master Plan Turismo 2021”.
Highlights Master Plan Turismo 2021
- Lo keda enfoca riba trece e turista di calidad, e obhetivo ta pa trece turistanan cu tin un entrada anual di 125 mil dollar of mas.
- Den e desaroyo di e mercado di turismo deportivo gobierno ta explorando e posibilidad pa traha un “mountain bike trail”, lo bay continua cu e beach tennis na su localidad nobo banda di ex bushiri hotel y lo bay restora e tennis courtnan na Baby Beach.
- Pa loke ta trata desaroyo economico na San Nicolas lo bay drecha ful e infrastructura di e area di Baby beach y Rodgers Beach, lo traha piernan nobo tambe na Rodgers Beach.
- Pa e desaroyo di nos porta nan di entrada esta nos Aeropuerto (AAA) y nos Waf (APA) lo tin e dos mega proyecto cu ta “Gateway 2030” y “Port City”.
- Den e area di desaroyo sostenibel e gobierno aki lo enfoca na preserva nos naturalesa mastanto cu ta posibel.
- Lo sigui enfoca riba mehora e producto Aruba cu proyectonan manera Malmok Boardwalk, proyecto di embeyesimento di Palm Beach (dilanti di Brickel Bay), proyecto di embeyesimento di Hooiberg por medio di arte.
- Gobierno lo bay sigui explora mercadonan nobo cu tin potencial, lo purba na logra di elimina loke ta wordo yama e “low season”.
Turismo ta e driver di nos economia y pesei su desaroyo ta keda un prioridad. E gobierno aki ta para pa turismo di calidad, e turista cu ta bin pa gasta placa y contrubui na nos economia.