Diaranson mainta durante un conferencia di prensa na Departamento di Agricultura, Cria y Pesca/Santa Rosa, e titular di e cartera di Sector Primario, Minister Chris Romero, a anuncia inicio di e proyecto titula “Hofi Amistad”.
Finalidad di e proyecto “Hofi Amistad” ta pa involucra nos hobennan activamente den e cultura di plantamento, cual den futuro lo por resulta como parti di e curriculum escolar na diferente scol secundario y avansa di Aruba.
E proposito principal tras di e proyecto aki ta pa conscientisa e studiantenan riba e importancia di produci nos mesun cuminda y con, trahando den grupo, por saca mas beneficio di e plantamento propio.
Lo pidi e studiantenan pa traha un opstel di e proyecto cu nan lo presenta, cual lo wordo uza cu e proposito di haya un bista for di nos hobennan di con nan ta imagina nan hofi escolar y con nan mes lo por mantene esaki y saca beneficio di dje.
E idea tras di e proyecto “Hofi Amistad” ta pa e bira un evento anual y cu lo involucra e scolnan di Aruba. Lo documenta e desaroyo di cada hofi escolar. E miho modelo lo sirbi pa wordo aplica den otro proyectonan di plantacion urbano (urban farming) cu lo wordo introduci den un futuro cercano.
E meta principal tras di e proyecto “Hofi Amistad” ta pa conta cu e participacion di varios scol y cu den futuro por bolbe expone e resultado di e hofinan aki mediante e Festival di Cuminda Crioyo, cual Santa Rosa ta celebra tur aña na luna di october.