Oncoloog/Hematoloog dr. Jonkhoff lamentablemente a perde e bataya. Dentro di poco e ta bandona Aruba. Tur su intentonan pa keda traha na Aruba a dal den un muraya rigido. E desaroyo aki ta malo pa cuido medico aki na Aruba. Cu gobierno a laga cos yega asina leu ta incomprendibel, asina lider di partido AVP mr.Mike Eman, kende ta masha preocupa cu e situacion, a bisa.
Minister di Salubridad Publico, responsabel pa un bon cuido medico na Aruba, a faya formalmente den e caso di dr. Jonkhoff. Esaki ta bay a costo di e cuido di pashent na Aruba. Ex Prome Minister di Aruba Mike Eman ta masha preocupa cu e situacion reinante, sigur pa e pashentnan cu ta sufri di e teribel enfermedad cancer.”Durante e ultimo añanan mi a siña conoce dr. Jonkhoff como un medico capacita y envolvi, kende semper ta pone su pashentnan na prome lugar. Mi mes a constata hopi bes con dr. Jonkhoff tabata tuma tur su tempo den weekends y cualkier momento di dia y anochi pa asisti su pashentnan cu tabatin mester di dje. Mi ta haya asina lamentabel cu awor e ta para dilanti portanan cera den su buskeda pa hunto cune tin un oncologo mas pa por eherce oncologia na Aruba responsablemente, mirando e cantidad di pashent cu tin cu ta rekiri por lo menos dos oncoloog den servicio permanente di hospital of AZV. El a bira un bos solitario den desierto cu su pasion pa su pashentnan y pa un miho cuido na Aruba”. Su peticion pa pone un oncoloog mas banda di dje a bira motibo pa busca conflicto cu dr. Jonkhoff.
Eman no ta solamente precocupa, pero tambe rabia cu e situacion. “Cancer, segun un rapport riba mortalidad traha door dr. Fabio Moreta, ta un di e causantenan mortal mas grandi na Aruba. Si bo tin un bon specialista manera dr. Jonkhoff bo no ta lage bay sin mas. Cada bes di nobo conflictonan personal ta causa perdida di specialistanan importante pa Aruba”, Eman a accentua.
“Hospital ta bay traha un bes mas cu waarnemers cu sea ta pensionado of no, pero cu nunca ta bay tin un relacion adecuado di confiansa cu e pashent pa motibo di e tempo cortico y varia cu nan ta aki. Banda di esaki e chens pa tin fayo den diagnosis tambe tey, mirando cu pa motibo di ta traha cu waarnemers no tin un bon traspaso ni follow up. Na e momentonan aki no ta conoci ken ta e oncologo cu ta bay traha na lugar di dr. Jonkhoff ora esaki bandona su trabou dia 1 di mei. Mi ta sumamente preocupa cu e situacion aki”, Eman, lider di e partido politico mas grandi ta bisa.
“Gobierno y sigur e Minister en cuestion no a haci bastante pa evita cu dr. Jonkhoff ta haya su mes forza ta bandona Aruba. Esey ta un fayo grave, pasobra aki bida di hende ta core peliger. Tambe e toke humano y sosten moral di nan dokter di confianza cu pashentnan cu ta pasando den un periodo dificil di nan bida ta wordo afecta. Cu waarnemers cu ta bin y bay bo no ta desaroya e relacion di confianza y sosten aki, Eman ta expresa.
Ta incomprendibel con poco sentimento gobierno ta mustra den e caso aki pa e pashent y tambe e muestra di falta di responsabilidad cu tin pa loke ta e pashent cu ta sufriendo cu no tin unda pa bay of cu ta wordo confronta cu un retraso den su tratamento.”
Eman ta bisa cu el a compronde cu ya caba tin waarnemers cu a laga sa cu si dr. Jonkhoff mester bay nan no ta bin pa neem waar mas. Nan ta haya cu el a haya un maltrato innecesario pero tambe ta haya cu nunca e situacion mester a yega asina leu cu ta crea un situacion irresponsabel door di falta di un oncologo permanente na Aruba. Motibonan cu varios di nan no kier bin traha aki mas como waarnemers tampoco. Con ta sigui cu e cuido pa pashentnan di cancer ta keda un misterio. Lo mester haci algo lihe pa evita e desaster crea door di e situacion indeciso y di tardansa aki. Pa salba bida di hende mester tuma accion awor”, asinae lider di oposicion mr. Mike Eman hopi preocupa ta enfatisa.