ORANJESTAD – E manifestacion cultural a inicia diadomingo atardi cu un feria culinario arubano y benta di productonan artesanal y entretenimento di Agrupacion Tipico Sonido di Antaño. Despues cu e mandatarionan y demas invitado y e publico a yega, pa 8 or di anochi e maestro di ceremonia Srta. Larissa Bermudez a inicia cu e programa cual a wordo haci den un forma sublime. E promer acto tabata e entrada di nos bandera di Aruba pa alumnonan di Chaz Dancers sigui pa e Himno di Aruba interpreta pa e gran cantante cu un voz unico Sra. Tabitha Smith-Heemstad cual a wordo acompaña pa e maestro Ivan Quandus y Quinteto. Por a nota nos himno di Aruba wordo interpreta pa Sra. Stella Montsanto den lenguahe di seña algo hopi bunita.
A sigui cu discurso di Minister sra. mr. Xiomara Ruiz-Maduro anfritiona di e evento. Un discurso cu impactante caminda a enfoca riba e forza di nos Pais cu ta nos poder di coherencia. Na momentonan importante, decisivo of di reto, nos Pueblo a sa semper di uni pa logra surpasa tur obstaculo y crece como Pais. E mandatario a haci un yamada pa union y pa hunto yama Dios danki pa e bendicion di coherencia aki. Uni semper nos lo vence.
Riba e programa e publico presente por a presencia un baile di energia presenta pa Elias, un artista di arte di baile ilumina. Un show expectacular cu a impresiona esnan presente.
E cantante Sra. Tabitha Heemstad a interpreta e cancionnan cu ta inspira nos nacion “Djies mi mes” y “My Hope, cual a wordo acompaña pa e maestro Ivan Quandus y Quinteto
“Kids and Youth In Action” a presenta un bunita coreografia di Jeanique de Palm cu e tema di show Aña di Famia acompaña pa un potpouri cu musica varia. Riba e anochi aki tabata tin presentacion di ganadornan (Pre)- Hubenil Gismary Linarez cu e cancion “Pone bo man riba nos”, pa categoria Hubenil e hoben Jaydiene Croes a presenta e cancion “Mane Bo ta” y pa Adulto e ganador Maximo di Festival “Un canto pa Aruba su Himno y Bandera”, e dou Jerwin Hernandez y Mary-Ann Rodriquez a demostra cu Aruba ta grandi den talento. E presentacionnan a demostra e aprecio pa nos cultura. Ganador absoluto di Poeta di Patria Sra. Melendy Bisslik-Neuman a declama su poema ganador “Nos Cultura, Ban protehe” acentuando nos responsabilidad patriotico.
E anochi no por a keda sin falta e presentacion di Popcorn Dancers cu a trece riba escenario “Un bishita na Museo”, cual ta un potpourri folklorico acompaña pa nos gran dama cultural Sra. Nyohmi van der Biezen, cual e publico a encanta grandemente.
Mester trece dilanti cu na varios ocasion durante e anochi a duna honor y reconocimiento na nos Libertador Betico Croes dfm cu ta e persona cu a bin cu e simbolonan patrio pa uni nos pais den e lucha pa libertad. Varios di su dichonan a ser treci dilanti e.o. “No tin pueblo sin cultura, no tin cultura sin tradicion, no tin liberacion cultural autentico si no tin liberacion politico promer”. Ta danki na e liderazgo di Betico, Aruba por celebra Nos Himno y Bandera, manera Betico mes a expresa “Un pais sin su bandera, sin su himno, ta un pais sin destino. Un isla cu ta preparando su soberania, mester di su himno y bandera”.
Demostrando union entre nos artistanan tres cantante a uni y a duna homenahe na e gran celebracion. E presentacion di Rocco Franken, Francienne Vos y Jair “Buddy” Vesprey. Cu nan tremendo voz a duna realse na nos cancionnan cu mester wordo recorda pa semper. Den e produccion aki e maestro Raul Piar y su banda All Star Band tabata encarga pa presenta cu e tres artistanan un potpouri di diferente cancion popular cu a entretene e publico hibando e celebracion na un climax total. Un tremendo presentacion cu a wordo acompaña cu baile di Popcorn Dancers.
Elias a duna un segundo presentacion impresionante y sorpresa cu un baile di candela cual ta simbolo di sabiduria y conocemento. E presentacion a wordo acompaña pa Massive Brassband cu despues a sigui poniendo un ambiente maximo riba plaza Libertador Betico Croes.
E anochi a sera den grandi cu presentacion di Upgrade Music y nos artista Internacional Jeon cu a trece un espectaculo impresionante treciendo un ambiente festivo caminda e pueblo a baila y goza na un forma formidabel. Asina e anochi a sera cu un pueblo contento y felis saludando y felicitando otro y e mandatarionan pa nos Dia di Himno y Bandera. Un danki na pueblo di Aruba y invitadonan pa asisti na e magno evento aki cu a resulta den un plaza Libertador Betico Croes cu un publico grandioso. Un graficimento na e patrosinadornan Gobierno di Aruba, Minister di Finansa, Asuntonan Economico y Cultura, Departamento di Cultura, SETAR, ATA, Utilities NV, WEB Aruba NV, NV Elmar, CIBC Bank.