L.G.SMITH BOULEVARD – Diabierna anochi Paramediconan di Ambulance a bay Royal Plaza, pa atende un persona cu a cay dal su cabes basta duro.
Na yegada di e Paramediconan nan a constata cu no tawata zomaar un persona a cay, pero cu ela wordo agredi door di un otro persona.
Pa e motibo aki a pidi presencia di autoridad.
Na yegada polis a compronde di testigonan cu tawata trata di un discussion entre dos colega Security. E discussion aparentemente tawata over di un Microwave.
Dado momento e discussion a escala y e security di inicial R a dal e otro un mokete hopi duro. Door di e esaki su colega a bay vloer y dal su cabes, causando sangramento.
Paramediconan mirando e seriedad di e golpi mesora a move cune pa hospital. Polis na nan yegada despues di a haya tur informacion necesario a bay over na detene e security cu no a gusta cu ela wordo geboei.
Ariba vloer na Royal Plaza tawata tin sanger unda e security herida a cay dal su cabes.
