Awe 12 maart ta exactamente 36 aña pasa cu durante e Conferencia di Mesa Rondo (RTC) na Hulanda – bao guia di nos Libertador Betico Croes – a logra corona cu exito e lucha di nos pueblo pa su Status Aparte.
Aruba a inicia e proceso estatal na un manera acelera desde 9 di februari 1971, fecha cu a funda partido MEP, cu e meta primordial pa realisa e anhelo cu pa añanan largo tabata biba bao di nos pueblo. Desde e tempo ey a ser organisa varios cumbre politico pa por convence tanto e politiconan di Hulanda como esunnan di Antiyas cu e constelacion Antiyano no ta un unidad berdadero y no tabata faborece Aruba. Ta den e cuadro aki a acepta den Eilandsraad mocionnan pa manda un delegacion, cu e instruccionnan necesario pa bay negocia na e Conferencia di Mesa Rondo na Hulanda, di dia 7 pa 12 di maart 1983. Nos pais tabata representa pa tur e partidonan politico, gremionan comercial, sindical y clero.
Logronan di RTC 1983
Locual nos a logra exactamente riba un dia manera awe 36 aña pasa ta encera entre otro lo siguiente:
- Saliendo for di e derecho di autodeterminacion di cada un di e islanan, e conferencia ta acepta e resolucion di Aruba pa haci uzo awor di su derecho di autodeterminacion, door di scoge definitivamente pa independencia, cu mester wordo realisa na aña 1996. E fecha aki lo wordo poni den Statuut. Hulanda lo duna su aporte pa Aruba haya reconocimiento di derecho internacional. Alavez cu prome cu 1996 lo wordo teni un conferencia di evaluacion entre Reino y Aruba, pa eventualmente examina e fecha di independencia di Aruba, den luz di evolucionnan estatal entre e paisnan di Reino.
- E conferencia ta bay di acuerdo tambe cu Aruba como fase transitorio prome cu independencia ta haya un periodo di 10 aña. Mientras tanto Aruba lo haya un Status Aparte cual ta posicion como pais autonomo den Reino Hulandes a base di Statuut. E status aki lo inicia dia 1 di januari 1986. Tabatin den total 33 punto di conclusion di RTC.
De kogel is door de kerk
Na e Conferencia di Mesa Rondo, e lider y vocero di e delegacion Arubano Betico Croes a acepta e exigencia cu Hulanda a impone, esta cu Aruba mester yena e fecha di Independencia, pero el a percura tambe pa hinca un clausula hopi importante den e acuerdo cual ta un conferencia di evaluacion y cu posibilidad di posponemento di e fecha di independencia (Ex-Prome Minister Nelson Oduber a logra pa schrap e fecha di 1996 for di den Statuut dia 13 di juli 1990!). E logro di Status Aparte a sorprende tur hende, hasta e ex-Minister Presidente di Hulanda Ruud Lubbers, kende na final di e conferencia a expresa “De kogel is door de kerk” y cual ta simbolisa e culminacion di e lucha largo cu Aruba mester a hiba pa yega na e logro di Status Aparte. E acuerdo historico aki a ser firma pa ex-Premier di Hulanda Ruud Lubbers, ex-Premier di Antiyas Don Martina y e lider di pueblo Arubano Betico Croes.
Aruba a bira pais den Reino Hulandes
Despues di a concretisa e deseo di e pueblo Arubano pa su libertad na e RTC, Betico Croes a ser ricibi como un heroe na Aeropuerto Reina Beatrix riba dia 18 di maart 1983. Betico a logra loke otronan no tabata por y kendenan a tuma esaki pa un hazaña imposibel. Hecho ta cu e Status Aparte a ser logra despues di apenas 12 aña di lucha intensivo, esta di 1971 pa 1983! Y ta danki na e logro aki, Aruba a bira pais autonomo den Reino Hulandes y orguyoso di tin su propio Gobierno, Parlamento, Gobernador, Banco Central y moneda propio y propio instrumentonan economico pa por desaroya nos pais. Un pais digno y respetuoso den Reino Hulandes.
Pues laga e dia di awe ta un dia di reflexion pa balora e lucha inmenso cu nos Libertador Betico Croes a hiba 36 aña pasa durante e Conferencia di Mesa Rondo y cu a culmina den e realisacion di nos Status Aparte. E fecha di 12 maart 1983 lo keda marca pa semper den e historia politico y estatal di Aruba.